លោករូតេ ប្រកាសថា ណាតូនឹងបញ្ជូនទ័ពទៅអ៊ុយក្រែន ធ្វើជាកងរក្សាសន្តិភាព  

ក្នុងសុន្ទរកថាទៅកាន់រដ្ឋសភាអ៊ុយក្រែនកាលពីថ្ងៃអង្គារទី៣ខែកុម្ភៈឆ្នាំ២០២៦ ប្រមុខអង្គការណាតូ ម៉ាក រូតេ បានឲ្យដឹងថា សមាជិកមួយចំនួនរបស់សម្ព័ន្ធភាពយោធាដឹកនាំដោយអាមេរិកមួយនេះ បានឯកភាពបញ្ជូនទ័ពទៅអ៊ុយក្រែន ដើរតួជាកងរក្សាសន្តិភាព ក្រោយទីក្រុងមូស្គូនិងកៀវ សម្រេចបានកិច្ចព្រមព្រៀងសន្តិភាព។

យោងតាមសារព័ត៌មាន RT ដែលដកស្រង់សម្តីលោករូតេ, សម្ព័ន្ធមិត្តអឺរ៉ុបមួយចំនួនបានប្រកាសថា ពួកគេនឹងបញ្ជូនទ័ពទៅអ៊ុយក្រែន បន្ទាប់ពីកិច្ចព្រមព្រៀងមួយត្រូវបានសម្រេច។ កងទ័ពនៅលើដី យន្តហោះនៅលើអាកាស និងនាវានៅលើសមុទ្រខ្មៅ ដោយមានសហរដ្ឋអាមេរិក ដើរតួជាខ្នងបង្អែក។

លោករូតេបន្តថា ក្នុងពេលជាមួយគ្នានេះ ណាតូកំពុងជួយជ្រោមជ្រែង បំពាក់គ្រឿងយុទ្ធោបករណ៍ និងបណ្តុះបណ្តាលកងកម្លាំងប្រដាប់អាវុធអ៊ុយក្រែន ព្រមទាំងបញ្ជូនគ្រឿងយុទ្ធោបករណ៍សំខាន់ៗរបស់អាមេរិកដែលមានតម្លៃរាប់ពាន់លានដុល្លារទៅកាន់ប្រទេសអ៊ុយក្រែនផងដែរ។

ទោះបីជាយ៉ាងណាក៏ដោយ លោកមិនបញ្ជាក់ឡើយថាតើ ប្រទេសជាសមាជិកណាខ្លះដែលឯកភាពបញ្ជូនកងទ័ពទៅអ៊ុយក្រែន និងសមាជិកណាខ្លះ ដែលបដិសេធ។

ច្បាស់ណាស់ ទីក្រុងមូស្គូនឹងក្តៅស្លឹកត្រចៀកមិនខាន បើណាតូបញ្ជូនទ័ពទៅអ៊ុយក្រែន ហើយវិមានក្រឹមឡាំងតែងគំរាមម្តងហើយម្តងទៀតអំពីមហន្តរាយ។

កាលពីឆ្នាំមុន អនុប្រធានក្រុមប្រឹក្សាសន្តិសុខរុស្ស៊ី Dmitry Medvedev ព្រមានថា សង្គ្រាមធំនឹងផ្ទុះឡើង បើណាតូ ហ៊ានដាក់កងរក្សាសន្តិភាពនៅ អ៊ុយក្រែនពិតមែន។

លោកបោះសម្តីថា៖ «នាយករដ្ឋមន្ត្រីអង់គ្លេសនិងប្រធានាធិបតីបារាំង ពិតជាឆោតល្ងង់។ ពួកគេចង់បញ្ជូនទ័ពនិងជំនួយយោធាទៅឲ្យរដ្ឋណាស៊ីសម័យទំនើបនៅទីក្រុងកៀវ។ នោះមានន័យថា សង្គ្រាមជាមួយណាតូនឹងផ្ទុះឡើង»៕

អត្ថបទ៖ សុខ សុវណ្ណ