ធ្លាក់ឧទ្ធម្ភាគចក្រយោធាកូរ៉េខាងត្បូង ស្លាប់មនុស្ស២នាក់

មនុស្ស២នាក់បានស្លាប់ក្នុងគ្រោះថ្នាក់ធ្លាក់ឧទ្ធម្ភាគចក្រយោធារបស់ប្រទេសកូរ៉េខាងត្បូង ខណៈពេលកំពុងហោះហើរហ្វឹកហាត់។

Reuters ផ្សាយថា ហេតុការណ៍នេះកើតឡើងនៅព្រឹកថ្ងៃចន្ទទី៩ខែកុម្ភៈឆ្នាំ២០២៦ ក្នុងតំបន់ Gapyeong ចំណែកមូលហេតុនៅមិនទាន់ត្រូវបានគេដឹងនៅឡើយទេ។

យ៉ាងណា កងទ័ពកូរ៉េខាងត្បូងកំពុងបង្កើតគណៈកម្មការស៊ើបអង្កេត ដើម្បីពិនិត្យមើលថាតើគ្រោះថ្នាក់នេះបណ្តាលមកពី បញ្ហាបច្ចេកទេស ឬ កត្តាអាកាសធាតុ។

តាមការឲ្យដឹងពីមន្ត្រីយោធា, ឧទ្ធម្ភាគចក្រនេះជាប្រភេទវាយប្រហារ AH-1S Cobra ហើយអ្នកស្លាប់គឺជាអាកាសយានិក។ ដំបូងឡើយអ្នកទាំងពីរមិនទាន់ស្លាប់ភ្លាមទេ គ្រាន់តែរបួសធ្ងន់ ប៉ុន្តែក្រោយពេលបញ្ជូនទៅកាន់មន្ទីរពេទ្យនៅក្បែរកន្លែងកើតហេតុ ពួកគេត្រូវបានប្រកាសថា បាត់បង់ជីវិតហើយ។

សូមជម្រាបថា គ្រោះថ្នាក់នេះកើតឡើងចំពេលកងទ័ពកូរ៉េខាងត្បូង កំពុងបង្កើនការហ្វឹកហ្វឺនយោធាយ៉ាងខ្លាំងក្លា ដើម្បីត្រៀមលក្ខណៈឆ្លើយតបទៅនឹងការគំរាមកំហែងពីកូរ៉េខាងជើង។

ឧទ្ធម្ភាគចក្រប្រភេទ AH-1S Cobra នេះគឺជាយន្តហោះចាស់ឆ្នាំ ដែលកូរ៉េខាងត្បូងគ្រោងដកចេញពីបញ្ជីប្រើប្រាស់ជាបណ្តើរៗ ដើម្បីជំនួសមកវិញនូវឧទ្ធម្ភាគចក្រទំនើបៗផលិតក្នុងស្រុកដូចជា LAH៕

អត្ថបទ៖ សុខ សុវណ្ណ