លោក Rahman ស្បថចូលកាន់តំណែង ជានាយករដ្ឋមន្ត្រីថ្មី បង់ក្លាដែស ក្រោយឈ្នះឆ្នោតយ៉ាងភ្លូកទឹកភ្លូកដី

លោក Tarique Rahman បានស្បថចូលកាន់តំណែងជានាយករដ្ឋមន្ត្រីបង់ក្លាដែសកាលពីថ្ងៃអង្គារទី១៧ ខែកុម្ភៈ ​ឆ្នាំ​២០២៦​ បន្ទាប់ពីដឹកនាំគណបក្សប្រឆាំងធំបំផុតនៃប្រទេសឲ្យទទួលបានជ័យជម្នះយ៉ាងភ្លូកទឹកភ្លូកដី នៅក្នុងការបោះឆ្នោតទូទៅ ដែលធ្វើឡើងកាលពីសប្តាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចេញផ្សាយពី NHK កាលពីថ្ងៃព្រហស្បតិ៍សប្តាហ៍មុន ប្រទេសបង់ក្លាដែសបានរៀបចំការបោះឆ្នោតទូទៅជាលើកដំបូងចាប់តាំងពីរដ្ឋាភិបាលរបស់អតីតនាយករដ្ឋមន្ត្រី Sheikh Hasina បានដួលរលំនាឆ្នាំ ២០២៤ បន្ទាប់ពីការតវ៉ាទ្រង់ទ្រាយធំដែលភាគច្រើនដឹកនាំដោយនិស្សិត។ លោកស្រី Hasina បានគ្រប់គ្រងប្រទេសអស់រយៈពេលប្រហែលជា១៥ ឆ្នាំ។

គណបក្សជាតិនិយមបង់ក្លាដែស (BNP) ដែលដឹកនាំដោយលោក Rahman ឥឡូវនេះមានអាសនៈចំនួន ២០៩ ក្នុងចំណោម ៣០០ អាសនៈនៅក្នុងសភា។ លោកបានដឹកនាំគណបក្សឲ្យទទួលបានជ័យជម្នះ និងការការគាំទ្រយ៉ាងទូលំទូលាយ ដោយសង្កត់ធ្ងន់លើភាពខុសគ្នាពីរដ្ឋាភិបាលមុន និងផ្លាស់ប្តូរនយោបាយដ៏សំខាន់មួយនៅក្នុងប្រទេសអាស៊ីខាងត្បូង បន្ទាប់ពីរយៈពេលនៃភាពចលាចល។ ជាពិសេស អំពើពុករលួយបានរីករាលដាលក្នុងចំណោមអ្នកនយោបាយ និងមន្ត្រីរាជការ ហើយអត្រាគ្មានការងារធ្វើក្នុងចំណោមនិស្សិតបញ្ចប់ការសិក្សាបានលើសពី ១៣ ភាគរយ។ ប្រជាជននៅក្នុងប្រទេស ជាពិសេសយុវជនជំនាន់ក្រោយ កំពុងអំពាវនាវកាន់តែខ្លាំងឡើងឲ្យមានកិច្ចខិតខំប្រឹងប្រែងដើម្បីដោះស្រាយបញ្ហាអំពើពុករលួយ និងបង្កើតការងារ។

ទោះជាយ៉ាងនេះក្ដី ជ័យជម្នះនេះនឹងធ្វើឲ្យលោក Rahman ប្រឈមមុខនឹងបញ្ហាប្រឈមជាបន្ទាន់ រួមទាំងការស្តារស្ថិរភាពនយោបាយ ការកសាងទំនុកចិត្តរបស់វិនិយោគិនឡើងវិញ និងការរស់ឡើងវិញនូវឧស្សាហកម្មសំខាន់ៗដូចជាវិស័យកាត់ដេរ បន្ទាប់ពីភាពចលាចលដែលបានកើតឡើង នៅក្នុងការបះបោរដឹកនាំដោយឧត្តមសេនីយ៍ Z ដែលផ្តួលរំលំរដ្ឋាភិបាលរបស់ Sheikh Hasina ក្នុងឆ្នាំ ២០២៤។

គួរបញ្ចាក់ផងដែរថា លោកTarique Rahman គឺជាកូនប្រុសច្បងរបស់អតីតនាយករដ្ឋមន្ត្រី Khaleda Zia ដែលជានាយករដ្ឋមន្ត្រីស្ត្រីដំបូងក្នុងប្រទេសបង់ក្លាដែស។ ក្រោយមក លោកបានចាកចេញពីចក្រភពអង់គ្លេសកាលពីខែធ្នូ បន្ទាប់ពីនិរទេសខ្លួន ដើម្បីវិលត្រឡប់ចូលមកស្រុកកំណើតប្រឡូកក្នុងឆាកនយោបាយវិញ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

រក​ឃើញ​មេ​ដឹកនាំ​បង់ក្លាដែស​ថ្មី ក្រោយ​បាតុកម្ម «Gen Z» ផ្ដួល​រំលំ​របប​​​លោកស្រី Sheikh Hasina