មេខ្លោងគ្រឿងញៀនដ៏សាហាវបំផុតរបស់ម៉ិកស៊ិក «El Mencho» ត្រូវកងកម្លាំង​សន្តិសុខ​បាញ់សម្លាប់

មេខ្លោងគ្រឿងញៀនដ៏គួរ​​ឲ្យ​ខ្លាចបំផុតរបស់ម៉ិកស៊ិក គឺលោក Nemesio Oseguera Cervantes ដែ​ល​មាន​រហស្សនាម​ថា «El Mencho» ត្រូវបានកងកម្លាំងពិសេសបាញ់សម្លាប់ នៅក្នុងប្រតិបត្តិការយោធាដ៏តានតឹងមួយនៅទីក្រុង Tapalpa។

តាម​ការ​ផ្សាយ​របស់ BBC ចុះ​ថ្ងៃ​ទី​២៣​ខែ​កុម្ភៈ​ឆ្នាំ​២០២៦ អតីតមន្ត្រីប៉ូលិសវ័យ៥៩ឆ្នាំរូបនេះ ដែលជាអ្នកកសាងអាណាចក្រជួញដូរថ្នាំញៀនហ្វេនតានីល​ដ៏មហិមា​នៅ​ម៉ិកស៊ិក បាន​បាត់បង់ជីវិតដោយសាររបួសធ្ងន់ធ្ងរ ក្នុងពេលបញ្ជូនទៅកាន់រដ្ឋធានី បន្ទាប់ពីមានការផ្ទុះអាវុធយ៉ាងសាហាវជាមួយកងទ័ព។ កន្លងមក សហរដ្ឋអាមេរិកបានកំណត់​ប្រាក់រង្វាន់ចំនួន ១៥​លានដុល្លារ សម្រាប់ការចាប់ខ្លួន El Mencho។

ភ្លាមៗបន្ទាប់ពីការស្លាប់របស់មេខ្លោង​គ្រឿងញៀន​រូប​នេះ ក្រុមជួញដូរគ្រឿងញៀន Jalisco New Generation (CJNG) បានបើកការវាយប្រហារសងសឹកយ៉ាងខ្លាំងក្លានៅក្នុងរដ្ឋចំនួន៨ ដោយការដុតបំផ្លាញរថយន្ត បិទផ្លូវ និងវាយប្រហារលើកងកម្លាំងសន្តិសុខ។ នៅតំបន់ទេសចរណ៍ Puerto Vallarta និងទីក្រុង Guadalajara ភ្ញៀវទេសចររាប់ពាន់នាក់ត្រូវបានជាប់គាំង ដោយសារក្រុមហ៊ុនអាកាសចរណ៍ធំៗបានលុបចោលជើងហោះហើរ។ ទោះបីជាមានផ្សែងហុយទ្រលោមលើផ្ទៃមេឃក៏ដោយ ក៏​ប្រធានាធិបតីម៉ិកស៊ិក លោកស្រី Claudia Sheinbaum Pardo បានអំពាវនាវឲ្យពលរដ្ឋរក្សាភាពស្ងប់ស្ងាត់ ដោយអះអាងថា សកម្មភាពភាគច្រើននៅក្នុងប្រទេសនៅតែដំណើរការជាធម្មតា។

ជ័យជម្នះនេះគឺជាចំណុចរបត់ដ៏សំខាន់សម្រាប់រដ្ឋាភិបាលរបស់លោកស្រី Sheinbaum ក្នុងការពង្រឹងទំនាក់ទំនងជាមួយប្រធានាធិបតីអាមេរិក ដូណាល់ ត្រាំ។ នៅក្នុងប្រតិបត្តិការនេះ កងកម្លាំងសន្តិសុខដណ្តើមបានរថពាសដែក និងអាវុធធុនធ្ងន់រួមទាំងឧបករណ៍បាញ់គ្រាប់រ៉ុក្កែតផងដែរ។ អតីតឯកអគ្គរដ្ឋទូតអាមេរិក លោក Christopher Landau បានពិពណ៌នាថា El Mencho គឺជា «មេខ្លោងគ្រឿងញៀនដែលសាហាវយង់ឃ្នងបំផុតម្នាក់» ហើយការស្លាប់របស់គេគឺជា «ការវិវត្តន៍ដ៏អស្ចារ្យសម្រាប់ម៉ិកស៊ិក សហរដ្ឋអាមេរិក អាមេរិកឡាទីន និងពិភពលោកទាំងមូល»៕

ប្រែសម្រួល៖ ឈាង