ត្រាំ បញ្ជាក់ច្បាស់ហើយថា មិនអនុញ្ញាតឲ្យអ៊ីរ៉ង់ មានអាវុធនុយក្លេអ៊ែរដាច់ខាត

ជាថ្មីម្តងទៀត ប្រធានាធិបតីអាមេរិក ដូណាល់ ត្រាំ បានព្រមានខ្លាំងៗទៅអ៊ីរ៉ង់ ដោយលោកជំទាស់ដាច់ខាតចំពោះកម្មវិធីនុយក្លេអ៊ែររបស់ប្រទេសនេះ។

ក្នុងសុន្ទរកថា State of the Union នៅថ្ងៃពុធទី២៥ខែកុម្ភៈឆ្នាំ២០២៦ មេដឹកនាំសេតវិមានបានរំលេចពាក្យពេចន៍ច្បាស់ៗឲ្យអស់មន្ទិលសង្ស័យថា៖ អ៊ីរ៉ង់ ត្រូវព្រមានរួចហើយ គឺថ្ងៃមុខដាច់ខាតមិនឲ្យមានការប៉ុនប៉ងកសាងកម្មវិធីអាវុធរបស់ពួកគេឡើងវិញទេ ជាពិសេសអាវុធនុយក្លេអ៊ែរតែម្តង ប៉ុន្តែពួកគេនៅតែបន្តធ្វើរឿងនេះជាថ្មី។ ដ្បិតអាមេរិកកម្ទេចវាចោលហើយ ប៉ុន្តែអ៊ីរ៉ង់នៅតែកំពុងបន្តមហិច្ឆតាដ៏អាក្រក់របស់ពួកគេទៀត។

ទោះបីជាយ៉ាងណាក៏ដោយ លោក ត្រាំ នៅតែទុកឱកាសដោយអះអាងថា លោកនៅតែចង់សម្រេចបានកិច្ចព្រមព្រៀងមួយ ប៉ុន្តែក៏នឹងប្តេជ្ញាចិត្តយ៉ាងមុតមាំដែរថា អាមេរិកនឹងមិនអនុញ្ញាតឲ្យប្រទេសដែលជាអ្នកឧបត្ថម្ភភេរវកម្មលេខមួយនៅលើពិភពលោក ទទួលបានអាវុធនុយក្លេអ៊ែរជាដាច់ខាត ហើយនឹងមិនអាចបណ្ដោយឲ្យរឿងនោះកើតឡើងទេ។

ស្របពេលជាមួយគ្នានោះដែរ បើតាមការបញ្ជាក់របស់លោក ត្រាំ, អ៊ីរ៉ង់រួមជាមួយក្រុមតំណាងរបស់ខ្លួនបានសម្លាប់និងធ្វើឲ្យទាហានអាមេរិករាប់ពាន់នាក់រងរបួសរហូតដល់ធ្លាក់ខ្លួនពិការ ដោយសារតែគ្រាប់​បែកបង្កៃតាមដងផ្លូវ ហើយរបបអ៊ីរ៉ង់ថែមទាំងសម្លាប់បាតុករប្រហែល ៣២ ០០០នាក់ថែមទៀតផង។

មុនការថ្លែងសុន្ទរកថានេះ ក៏មានព័ត៌មានលេចឮមកផងដែរថា អាមេរិក បានបញ្ជូនយន្តហោះចម្បាំងបំបាំងកាយ F-22 ចំនួន១២គ្រឿង ទៅអ៊ីស្រាអែលរួចហើយ ដើម្បីត្រៀមវាយអ៊ីរ៉ង់។

បើតាមការផ្សាយរបស់ Times of Israel កាលពីថ្ងៃអង្គារទី២៤ខែកុម្ភៈឆ្នាំ២០២៦ យន្តហោះ ទាំងនេះ ត្រូវបានបញ្ជូនទៅមូលដ្ឋាន Ovda នៅភាគខាងត្បូងប្រទេសអ៊ីស្រាអែល។ 

មួយរយៈចុងក្រោយនេះ អាមេរិកបានខិតខំពន្លឿនការបង្កើនកម្លាំងទ័ពនិងដំឡើងសាច់ដុំយោធាខ្លាំងណាស់ រួមទាំងការបញ្ជូននាវាផ្ទុកយន្តហោះទៅមជ្ឈិមបូព៌ាផងដែរ ដើម្បីសម្លុតអ៊ីរ៉ង់ឲ្យធ្វើយ៉ាងណា ត្រូវបោះបង់ចោលកម្មវិធីនុយក្លេអ៊ែរឲ្យខាងតែបាន៕

អត្ថបទ៖ សុខ ​សុវណ្ណ