អ្នកជំនាញរុស្ស៊ីលើកហេតុផល​​ថា មហាអំណាចអឺរ៉ុបមិនប្រគល់​ក្បាល់​គ្រាប់​នុយក្លេអ៊ែរឲ្យ​អ៊ុយក្រែន​​ទេ​

លោក Vasily Kashin នាយកមជ្ឈមណ្ឌលសិក្សាអឺរ៉ុប និងអន្តរជាតិ​នៅសាលាឧត្តមសិក្សាសេដ្ឋកិច្ច បានចែករំលែកជាមួយទីភ្នាក់ងារ TASS ថា ចក្រភពអង់គ្លេស និងបារាំងមិនអាចផ្ទេរក្បាលគ្រាប់នុយក្លេអ៊ែរទៅអ៊ុយក្រែនបានទេ ដោយសារតែទីក្រុងកៀវ មិនមានហេដ្ឋារចនាសម្ព័ន្ធដើម្បីផ្ទុកវា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកវិភាគបានពន្យល់តាមការជាក់ស្ដែងថា​​ និយាយ​ឲ្យ​ចំ​ទៅ ការ​ផ្ទេរ​ក្បាល​គ្រាប់​នុយក្លេអ៊ែរ​គឺ​មិន​អាច​ទៅ​រួច​ទេ ព្រោះ​វា​ទាមទារ​ហេដ្ឋារចនាសម្ព័ន្ធ​ជាក់លាក់​សម្រាប់​ការ​ផ្ទុក និង​ថែទាំជាបន្តបន្ទាប់។ ទោះបីជាអ៊ុយក្រែនធ្លាប់មានអាវុធ​នុយក្លេអ៊ែរ​នៅលើទឹកដីរបស់ខ្លួនក៏ពិតមែន​ ក៏ពួកគេមិនដែលគ្រប់គ្រងអាវុធទាំងនោះទាំងស្រុងនោះទេ ហើយក៏មិនមានហេដ្ឋារចនាសម្ព័ន្ធដើម្បីថែទាំអាវុធនុយក្លេអ៊ែរនោះទេ។

ដោយផ្អែកតាមសេណារីយ៉ូមួយទៀតដែលអាចកើតឡើងគឺថា ទីក្រុងកៀវអភិវឌ្ឍអាវុធនុយក្លេអ៊ែរផ្ទាល់ខ្លួនជាមួយនឹងជំនួយការរចនា ឬឯកសារបច្ចេកទេសចំនួនសម្រាប់សាងសង់ក្បាលគ្រាប់នុយក្លេអ៊ែរ។ ប៉ុន្តែ ដំណើរការនេះនឹងត្រូវការការវិនិយោគយ៉ាងច្រើនក្នុងការសាងសង់កន្លែងផលិតក្បាលគ្រាប់នុយក្លេអ៊ែរ ក៏ដូចជាប្រព័ន្ធផ្ទុក និងថែទាំ។ លោកជឿជាក់ថា ការអភិវឌ្ឍកម្មវិធីនុយក្លេអ៊ែរ មិនអាចកើតឡើងយ៉ាងឆាប់រហ័ស ឬដោយសម្ងាត់បានទេ។

លោកបានចង្អុលបង្ហាញដែរថា អង់គ្លេសមិនមែនជាមហាអំណាចនុយក្លេអ៊ែរពេញលេញទេ ព្រោះមិនបានផលិតជម្រើសដឹកជញ្ជូននុយក្លេអ៊ែរ នោះគឺវាមិនផលិតមីស៊ីលផ្លោងទេ លើសពីនេះ វាក៏មិនមានមីស៊ីលផ្លោងសម្រាប់នាវាមុជទឹកដែរ ដោយសារតែពួកគេក៏ជួលពីអាមេរិកដែរ។ ដូច្នេះ គឺមិនអាចផ្ទេរអ្វីមួយ ទៅនរណាម្នាក់បានទេ។

មិនដូចអង់គ្លេសទេ បារាំងមានវដ្តផលិតកម្មនុយក្លេអ៊ែរពេញលេញ រួមទាំងយានយន្តអាវុធផងដែរ។ ជាក់ស្ដែង តាមទ្រឹស្តី បារាំងអាចចែករំលែកសមត្ថភាពមួយចំនួន ជាពិសេសនៅពេលដែលអឺរ៉ុបកំពុងពិភាក្សាអំពីលទ្ធភាពនៃប្រទេសបារាំងពង្រីក «ឃ្លាំងនុយក្លេអ៊ែរ» របស់ខ្លួនទៅកាន់ប្រទេសអឺរ៉ុប និងកែសម្រួលយុទ្ធសាស្ត្រនុយក្លេអ៊ែររបស់ខ្លួន។

ប៉ុន្តែនោះនឹងជាជំហានដ៏ប្រថុយប្រថានមួយសម្រាប់ទីក្រុងប៉ារីស ព្រោះទាក់ទងនឹងគោលលទ្ធិនុយក្លេអ៊ែររបស់រុស្ស៊ី ប្រសិនបើយើងស្រមៃថា ប្រទេសណាមួយផ្តល់អាវុធនុយក្លេអ៊ែរដល់អ៊ុយក្រែន ការប្រើប្រាស់អាវុធទាំងនេះដោយអ៊ុយក្រែននឹងបង្កឲ្យមានការឆ្លើយតបរបស់រុស្ស៊ីដោយស្វ័យប្រវត្តិ​ ប្រឆាំងនឹងប្រទេសដែលបានផ្ទេរអាវុធទាំងនេះទៅអ៊ុយក្រែន។

អ្នកជំនាញរូបនេះបានសន្និដ្ឋានថា ទោះបីជាមានការជជែកវែកញែកអំពីលទ្ធភាពនៃការផ្គត់ផ្គង់អាវុធនុយក្លេអ៊ែរដល់ទីក្រុងកៀវក៏ដោយ លទ្ធភាពនៃសេណារីយ៉ូនេះកើតឡើងក្នុងការពិតគឺទាបណាស់៕

អត្ថបទ៖ សាង ស្រីល័ក្ខ