ពលរដ្ឋថៃម្នាក់ ស្លាប់នៅអ៊ីស្រាអែល ដោយសារគ្រាប់បែកចង្កោមរបស់អ៊ីរ៉ង់ 

សារព័ត៌មាន Bangkok Post ផ្សាយនៅថ្ងៃព្រហស្បតិ៍ទី១៩ខែមីនាឆ្នាំ២០២៦ថា ពលរដ្ឋថៃម្នាក់ ដែលជាកម្មករនៅអ៊ីស្រាអែល បានបាត់បង់ជីវិតក្នុងការវាយប្រហារដោយគ្រាប់បែកចង្កោមរបស់អ៊ីរ៉ង់។

បើតាមការបញ្ជាក់ពីក្រសួងការបរទេសថៃ កម្មករម្នាក់នោះបានស្លាប់ អំឡុងការវាយប្រហារកាលពីរាត្រីថ្ងៃពុធទី១៨ខែមីនាឆ្នាំ២០២៦ នៅតំបន់ Sharon ភាគខាងជើងទីក្រុង Tel Aviv។

ទោះបីជាយ៉ាងណាក៏ដោយ ប្រទេសថៃ មិនទាន់បញ្ចេញប្រតិកម្មអ្វីទេ ចំពោះរឿងនេះ។

ពាក់ព័ន្ធបញ្ហានេះ អ្នកនាំពាក្យរងនៃក្រសួងការបរទេសលោក Panidone Pachimsawat បានអំពាវនាវឲ្យពលរដ្ឋថៃ ប្រញាប់ចាកចេញពីតំបន់មជ្ឈិមបូព៌ា ឲ្យបានលឿនបំផុតតាមដែលអាចធ្វើទៅបាន។

ជុំវិញការវាយប្រហារនៅមជ្ឈិមបូព៌ានេះដែរ កាលពីថ្ងៃពុធទី១១ខែមីនា កប៉ាល់ដឹកទំនិញថៃ Mayuree Naree ក៏រងការវាយប្រហារដែរ អំឡុងពេលធ្វើដំណើរចេញពីកំពង់ផែ ខាលីហ្វា នៃប្រទេសអារ៉ាប់រួម ឆ្ពោះទៅកាន់ប្រទេសឥណ្ឌា។ 

នាវិក២០នាក់ត្រូវបានជួយសង្គ្រោះនិងជម្លៀសដោយសុវត្ថិភាព ទៅកាន់ប្រទេសអូម៉ង់ ប៉ុន្តែ៣នាក់ទៀត នៅតែរកមិនទាន់ឃើញគិតត្រឹមពេលនេះ។

អ៊ីរ៉ង់ បញ្ជាក់ច្បាស់ៗថា ឆ្មាំបដិវត្តន៍ (IRGC) បាញ់កប៉ាល់ថៃ ព្រោះតែ មិនព្រមស្តាប់ការព្រមានហើយថែមទាំងផ្គើនថែមទៀត។ តាមការអះអាងរបស់ IRGC, កប៉ាល់នេះ គឺធ្វើដំណើរឆ្លងកាត់តាមច្រកសមុទ្រ Hormuz ដោយខុសច្បាប់៕

អត្ថបទ៖ សុខ សុវណ្ណ