លោក Araghchi៖ ការវាយប្រហារហេដ្ឋារចនាសម្ព័ន្ធស៊ីវិល នឹង​មិនបង្ខំឲ្យអ៊ីរ៉ង់ចុះចាញ់ទេ

រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយកាលពីថ្ងៃព្រហស្បតិ៍ទី២មេសា ​ក្រោយ​កា​រព្រមាន​របស់​អាមេរិក​ ថា ការវាយប្រហារដោយសហរដ្ឋអាមេរិក និងអ៊ីស្រាអែលលើហេដ្ឋារចនាសម្ព័ន្ធស៊ីវិល នឹងមិនបង្ខំឲ្យជនជាតិអ៊ីរ៉ង់ចុះចាញ់ទេ ហើយសកម្មភាពបែបនេះឆ្លុះបញ្ចាំងពីការដួលរលំខាងសីលធម៌របស់សត្រូវដែលកំពុងស្ថិតក្នុងភាពច្របូកច្របល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារ​ព័ត៌មាន​រុស្ស៊ី​ tass ដោយស្រង់ចេញ​ពី​​ការបង្ហោះមួយនៅលើបណ្ដាញសង្គម X លោក Araghchi បានសរសេរ​ថា ការវាយប្រហាររចនាសម្ព័ន្ធស៊ីវិល រួមទាំងស្ពានដែលមិនទាន់បានបញ្ចប់​គម្រោង​ នឹងមិនបង្ខំឲ្យជនជាតិអ៊ីរ៉ង់ចុះចាញ់ទេ។ ការវាយប្រហារ វាគ្រាន់តែបង្ហាញពីការបរាជ័យ ហើយកំពុងធ្វើឲ្យខូចរូបភាពរបស់ទីក្រុងវ៉ាស៊ីនតោនតែប៉ុណ្ណោះ។

លោកថែមទាំងបាន​គូសបញ្ចាក់ទៀតថា ស្ពាន និងអគារនីមួយៗនឹងត្រូវបានសាងសង់ឡើងវិញឲ្យកាន់តែរឹងមាំជាងមុន។ អ្វីដែលមិនអាចងើបឡើងវិញបាននោះគឺ «ការខូចខាតដល់កិត្យានុភាពរបស់សហរដ្ឋអាមេរិក»។

កាលពីថ្ងៃព្រហស្បតិ៍ទី២ ខែមេសា  អាជ្ញាធរអ៊ីរ៉ង់បានរាយការណ៍ពីការវាយប្រហារពីរលើកលើស្ពានមួយ ដែលកំពុងសាងសង់នៅក្នុងទីក្រុង Karaj ភាគខាងលិចទីក្រុងតេហេរ៉ង់។ យ៉ាងហោចណាស់មានជនស៊ីវិលពីរនាក់ត្រូវបានសម្លាប់ នៅក្នុងការវាយប្រហារមួយនេះ៕

អត្ថបទ៖ សាង ស្រីល័ក្ខ