រុស្ស៊ីដាក់សំណើជួយដោះស្រាយបញ្ហានុយក្លេអ៊ែរអ៊ីរ៉ង់ តែ​អាមេរិកបដិសេធ

អ្នកនាំពាក្យវិមានក្រឹមឡាំង លោក Dmitry Peskov បានបង្ហើប​ឲ្យ​ដឹង​​កាល​ពី​ថ្ងៃ​​ពុធ​​ថា ប្រទេសរុស្ស៊ីធ្លាប់បានដាក់សំណើកម្រិតការទូត​ដ៏សំខាន់មួយ ដើម្បីជួយបញ្ចប់ជម្លោះដែលកំពុងឆាបឆេះ ដោយ​​នៅក្នុងសំណើនោះ លោកប្រធានាធិបតី វ្ល៉ាឌីមៀរ ពូទីន បានស្នើសុំយកសារធាតុអ៊ុយរ៉ាញ៉ូមដែលចម្រាញ់រួចទាំងអស់របស់អ៊ីរ៉ង់ មកផ្ញើទុកក្នុងប្រទេសរុស្ស៊ីវិញ ដែលលោកចាត់ទុកថាជា «ដំណោះស្រាយដ៏ល្អបំផុត»។ នេះ​បើយោងតាម​ការ​ផ្សាយ​របស់​ទីភ្នាក់ងារ​ព័ត៌មាន Anadolu នា​ថ្ងៃ​ព្រហស្បតិ៍​ទី​១៦​ខែ​មេសា​ឆ្នាំ​២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាង​ណា​មិញ ខាងរដ្ឋាភិបាលវ៉ាស៊ីនតោនបានសម្រេចចិត្តបដិសេធសំណើនេះ ប៉ុន្តែលោកពូទីន នៅតែ​បើកចំហរក្នុងការពិភាក្សារឿងនេះឡើងវិញ ប្រសិនបើភាគីពាក់ព័ន្ធត្រូវការ។

លោក Peskov ក៏បានរិះគន់ផងដែរចំពោះមូលហេតុនៃសង្គ្រាមនេះ ដោយលោកបានលើកឡើងថា ទីភ្នាក់ងារថាមពលបរមាណូអន្តរជាតិ មិនដែលរកឃើញភស្តុតាងដែលថាអ៊ីរ៉ង់កំពុងផលិតអាវុធនុយក្លេអ៊ែរនោះទេ ហើយរុស្ស៊ីយល់ថា នេះគ្រាន់តែជាលេសសម្រាប់បង្កការឈ្លានពានប៉ុណ្ណោះ។ ជាមួយគ្នានេះ លោកបានបដិសេធយ៉ាងដាច់អហង្ការថា រុស្ស៊ីមិនបានផ្តល់ជំនួយការសម្ងាត់ ឬភស្តុភារយោធាដល់អ៊ីរ៉ង់ឡើយ ដោយលោកបានបញ្ជាក់ថា «នេះមិនមែនជាសង្គ្រាមរបស់យើងទេ»។

សូម​ជម្រាប​ថា ការដកហូតយកស្តុកសារធាតុអ៊ុយរ៉ាញ៉ូមពីអ៊ីរ៉ង់ គឺជាលក្ខខណ្ឌស្នូលមួយរបស់សហរដ្ឋអាមេរិក ក្នុងការចរចាបញ្ចប់សង្គ្រាមដែលបានផ្ទុះឡើងតាំងពីចុងខែកុម្ភៈ។ បច្ចុប្បន្ន អ៊ីរ៉ង់មានសារធាតុអ៊ុយរ៉ាញ៉ូមកម្រិតខ្ពស់ប្រមាណ៤៥០​គីឡូក្រាម ដែលកំពុងលាក់ទុកក្នុងជម្រកក្រោមដី ហើយរដ្ឋមន្ត្រីការពារជាតិអាមេរិក លោក Pete Hegseth បានបញ្ជាក់យ៉ាងដាច់អហង្ការថា អ៊ីរ៉ង់ត្រូវតែប្រគល់វា​ឲ្យ​ដោយស្ម័គ្រចិត្ត បើមិនដូច្នោះទេ អាមេរិកនឹងប្រើវិធានការផ្សេងដើម្បីដណ្តើមយក​ឲ្យ​បាន៕

ប្រែសម្រួល៖ ឈាង