រុស្ស៊ី បង្ហើបថា ពូទីន និងត្រាំ អាចជួបគ្នានៅ ចិន ក្នុងខែវិច្ឆិកា

តាមការបង្ហើបឲ្យដឹងពីរុស្ស៊ី, ប្រមុខរដ្ឋាភិបាលទីក្រុងមូស្គូ វ្ល៉ាឌីមៀរ ពូទីន និងប្រធានាធិបតីអាមេរិក ដូណាល់ ត្រាំ អាចជួបគ្នានៅប្រទេសចិន ក្នុងខែវិច្ឆិកា ខាងមុខ។

សារព័ត៌មាន RT បានដកស្រង់សម្តីជំនួយការវិមានក្រឹមឡាំង លោក Yury Ushakov ដែលប្រាប់កាលពីថ្ងៃពុធ ទី២០ ខែឧសភា ឆ្នាំ២០២៦ ថា មេដឹកនាំទាំងពីរ អាចជួបគ្នានៅក្រៅកិច្ចប្រជុំកំពូល APEC ដែលនឹងរៀបចំធ្វើឡើងក្នុងទីក្រុង Shenzhen ចាប់ពីថ្ងៃទី ១៨-១៩ ខែវិច្ឆិកា ចុងឆ្នាំនេះ។

ទោះបីជាយ៉ាងណាក៏ដោយ បច្ចុប្បន្ន ទាំងភាគីរុស្ស៊ីនិងអាមេរិក សុទ្ធតែបញ្ជាក់ថា ខ្លួនមិនទាន់រៀបចំគម្រោងជាផ្លូវការណាមួយទេ សម្រាប់ជំនួបរបស់ប្រមុខដឹកនាំទាំងពីរ ដោយលោក Ushakov គ្រាន់តែបង្ហើបថា លោកពូទីន នឹងអញ្ជើញទៅចូលរួមកិច្ចប្រជុំកំពូល APEC ហើយពេលស្ថិតក្នុងប្រទេសចិន មេដឹកនាំទាំងពីរ ប្រហែលជានឹង មានជំនួបណាមួយជាក់ជាមិនខាន។

ព័ត៌មាននេះ កើតឡើង ក្រោយពេលទាំងលោកពូទីន និងលោកត្រាំ សុទ្ធតែទៅបំពេញទស្សនកិច្ចប្រទេសចិន ដែលបង្កការតាមដានយ៉ាងយកចិត្តទុកដាក់ ពីសំណាក់មជ្ឈដ្ឋានអន្តរជាតិ ព្រោះវាកើតឡើងចំពេលសភាពករណ៍ពិភពលោក កំពុងក្តៅ និងច្របូកច្របល់ ជាពិសេសជុំវិញសង្គ្រាមអ៊ីរ៉ង់។

យោងតាមការផ្សាយរបស់ The Guardian កាលពីថ្ងៃពុធ ទី២០ ខែឧសភា ឆ្នាំ២០២៦, ទស្សនកិច្ចរបស់មេដឹកនាំទាំងពីរ ទៅកាន់ទីក្រុងប៉េកាំង គឺជាការបញ្ជូនសញ្ញាដល់ពិភពលោកថា ប្រទេសចិន គឺជា «ស្នូលការទូតសកល»។

ទន្ទឹមនោះ បើតាមការផ្សាយរបស់ Al Jazeera, ដំណើរទស្សនកិច្ចបន្តបន្ទាប់គ្នានេះ សបញ្ជាក់យ៉ាងច្បាស់ថា ទាំងទីក្រុងវ៉ាស៊ីនតោន និងមូស្គូ សុទ្ធតែត្រូវការចិន ដើម្បីដោះស្រាយវិបត្តិសេដ្ឋកិច្ច និងនយោបាយរបស់ពួកគេ ដោយជឿថា ទីក្រុងប៉េកាំង កំពុងមានសន្លឹកបៀ ពិសេសនៅក្នុងដៃ។

សរុបសេចក្តីមក ដំណើរទស្សនកិច្ច គឺបង្ហាញពីសណ្តាប់ធ្នាប់ពិភពលោក បែបពហុប៉ូលថ្មី ដែលក្នុងនោះ ចិនបានដើរតួជា «ស្ពានការទូត» និងជាមជ្ឈមណ្ឌលអំណាច ដែលអាចឲ្យសហរដ្ឋអាមេរិក មកចរចាស្វែងរកផលប្រយោជន៍សេដ្ឋកិច្ច ខណៈរុស្ស៊ីមកពង្រឹងខែលការពារនយោបាយ និងយុទ្ធសាស្ត្រ៕

អត្ថបទ៖ សុខ សុវណ្ណ