រលកឆ្លងទី ៣ កាន់តែអាក្រក់ទៅៗ សភា ថៃ អនុម័តផែនការប្រាក់កម្ចី ១៦ ពាន់លានដុល្លារសម្រាប់ឆ្លើយតបកូវីដ

សភាថៃនៅថ្ងៃព្រហស្បតិ៍នេះ បានអនុម័តផែនការរបស់រដ្ឋាភិបាល ក្នុងការខ្ចីប្រាក់រហូតដល់ ៥០០ ពាន់លានបាត ពោលប្រហែល ១៦ ពាន់លានដុល្លារអាមេរិក ដើម្បីគាំទ្រវិធានការឆ្លើយតបជំងឺកូវីដ ១៩ ចំពេលមានរលករាលដាល ដ៏អាក្រក់បំផុតនាពេលថ្មីៗនេះ ។

ទន្ទឹមនោះ ថវិកាបន្ថែមដែលត្រូវបានទទួល ដោយក្រសួងហិរញ្ញវត្ថុ និងបញ្ចប់ការអនុម័យនៅចុងខែកញ្ញា ឆ្នាំ ២០២២  ត្រូវបានផ្តល់ការយល់ព្រមជាថ្មី ដោយមានសំឡេងគាំទ្រ ២៧០ លើ ១៩៦ ។

ផែនការនេះ ត្រូវបានប្រកាសកាលពីខែមុន នៅក្នុងកាសែត gazette ដែលបាននិយាយថា បំណុលថ្មីនឹងត្រូវបង្កើនជាប្រាក់កម្ចី ឬតាមរយៈការលក់មូលបត្រផ្សេងទៀត ។

បន្ថែមពីនេះ រដ្ឋមន្ត្រីក្រសួងហិរញ្ញវត្ថុ លោក Arkhom Termpittayapaisith បាននិយាយថា មូលនិធិនេះនឹងត្រូវចំណាយ ក្រោមវិន័យចំណាយរបស់រដ្ឋាភិបាល ហើយវាជា “មធ្យោបាយចុងក្រោយ” ដែលរដ្ឋាភិបាល អាចបន្តដោះស្រាយស្ថានការណ៍រោគរាតត្បាត ។

យោងតាមរដ្ឋមន្រ្តីក្រសួងហិរញ្ញវត្ថុរូបនេះ បានឲ្យដឹងថា មូលនិធិនេះ នឹងរួមបញ្ចូលថវិកាចំនួន ៣០០ ពាន់លានបាត សម្រាប់វិធានការសង្គ្រោះប្រជាជន ដែលរងផលប៉ះពាល់ដោយជំងឺរាតត្បាត ១៧០ ពាន់លានបាត សម្រាប់វិធានការស្តារសេដ្ឋកិច្ច និងសង្គម និង ៣០ ពាន់លានបាត សម្រាប់ទិញឧបករណ៍វេជ្ជសាស្រ្ត និងវ៉ាក់សាំងការពារជំងឺកូវីដ ១៩ ។

បច្ចុប្បន្នប្រទេសថៃ កំពុងពុះពារដើម្បីជម្នះនូវរលកទី ៣ នៃការរីករាលដាលជំងឺកូវីដ ១៩ ដែលចាប់តាំងពីដើមខែមេសា ប្រទេសនេះបានឃើញករណីឆ្លងលើសពី ៦ ដង ក្នុងករណីឆ្លងសរុប ក៏ដូចជាការកើនឡើងនៃចំនួនអ្នកស្លាប់ ជាដើម ។

គួរបញ្ជាក់ថា គិតត្រឹមពេលនេះ ប្រទេសថៃ មានករណីឆ្លងជំងឺកូវីដ ១៩ សរុប ១៨៧,៥៣៨ ករណី និងមានអ្នកស្លាប់ចំនួន ១,៣៧៥ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ ថៃ ប្រកាសមានអ្នកស្លាប់ថ្មី ដោយសារជំងឺកូវីដ-១៩ រហូតដល់ទៅ ៤៣ នាក់