ក្រុមជួយសង្គ្រោះ​ ២ ប្រទេស ទៅដល់អាមេរិក ជួយរកអ្នករស់រានមានជីវិតពីការបាក់អគារ

ក្រុមស្វែងរកនិងជួយសង្គ្រោះមកពីប្រទេសម៉ិកស៊ិកនិងអ៊ីស្រាអែល បានចូលរួមជាមួយក្រុមអ្នកពន្លត់អគ្គិភ័យក្នុងតំបន់និងអ្នកជំនាញដែលបានទទួលការបណ្តុះបណ្តាលពិសេសផ្សេងទៀត ដើម្បីស្វែងរកអ្នកនៅរស់រានមានជីវិតពីការបាក់អគារក្នុងទីក្រុង Miami កាលពីថ្ងៃព្រហស្បតិ៍សប្តាហ៍មុន ដោយបានសម្លាប់មនុស្ស៩នាក់ហើយ ខណៈជាង១៥០នាក់កំពុងបាត់ខ្លួន គិតត្រឹមថ្ងៃអាទិត្យទី២៧ខែមិថុនា។

នៅពេលនិយាយអំពីអគារបាក់រលំ មានក្រុមបុគ្គលិកសង្គ្រោះអន្តរជាតិជាច្រើនដែលមានបំណងឆ្លងដែនដើម្បីជួយ។ បុគ្គលិកជាច្រើនមកពីតំបន់ Miami-Dade ក៏មានបទពិសោធន៍ទៅជួយនៅឯបរទេសផងដែរ ជាពិសេសក្នុងពេលមានការរញ្ជួយដីដ៏សាហាវ ដែលបានវាយប្រហារប្រទេសហៃទីក្នុងឆ្នាំ២០១០។

កិច្ចសហប្រតិបត្តិការនេះ ឆ្លុះបញ្ចាំងពីលក្ខណៈអន្តរជាតិនៃតំបន់ Miami ដែលជាទីកន្លែងប្រមូលផ្តុំរបស់ជនជាតិឥស្លាមនិងអាមេរិកឡាទីន។

តួនាទីពិតប្រាកដរបស់ក្រុមជួយសង្គ្រោះម៉ិកស៊ិកនិងអ៊ីស្រាអែលនៅសហរដ្ឋអាមេរិក មិនត្រូវបានគេប្រាប់លម្អិតទេ។ មន្ត្រីក្នុងតំបន់និយាយថា ពួកគេមានជំនួយច្រើន ហើយកំពុងផ្លាស់ប្តូរកម្លាំងក្រុមជួយសង្គ្រោះ ដើម្បីឲ្យបុគ្គលិកស្រួលធ្វើការ។

លោក Ron DeSantis អភិបាលរដ្ឋ Florida បានប្រាប់សន្និសីទកាសែតមួយកាលពីថ្ងៃអាទិត្យថា “យើងពិតជាទទួលបានក្រុមតូចមួយ មកពីប្រទេសអ៊ីស្រាអែល។ ក្រុមគ្រួសារជាច្រើន ដែលបាត់បង់មនុស្សជាទីស្រឡាញ់ ចង់បានបែបនេះ”។

គួររម្លឹកឡើងវិញថា អគារអាផាតមិន Champlain Towers South ដែលត្រូវបានសាងសង់ក្នុងឆ្នាំ ១៩៨១ បានបាក់រលំដោយផ្នែកខ្លះនៅប្រហែលម៉ោង ១ និង ៣០ នាទីរំលងអាធ្រាត្រថ្ងៃព្រហស្បតិ៍៕

ប្រែសម្រួល៖ Vann Vann

ប្រភព៖ CNA

ចុចអាន៖ ចំនួនអ្នកស្លាប់ក្នុងហេតុការណ៍បាក់អគារនៅ Florida កើនឡើងបន្ថែមទៀត