ឥណ្ឌា អនុម័តវ៉ាក់សាំងទី ៤ សម្រាប់ប្រើប្រាស់ជាបន្ទាន់

កាលពីថ្ងៃអង្គារ រដ្ឋាភិបាលឥណ្ឌាបានអនុម័តវ៉ាក់សាំង Moderna សម្រាប់ការប្រើប្រាស់ជាបន្ទាន់ ខណៈប្រទេសនេះព្យាយាមបង្កើនយុទ្ធនាការចាក់វ៉ាក់សាំងរបស់ខ្លួន បន្ទាប់ពីមានការកើនឡើងគួរឲ្យកត់សម្គាល់ក្នុងករណីឆ្លង និងស្លាប់ ។

Moderna គឺជាវ៉ាក់សាំងទី ៤ ហើយដែលត្រូវបានយល់ព្រមដោយរដ្ឋធានីញូវដេលី បន្ទាប់ពីវ៉ាក់សាំង Covishield ដែលស្ថិតក្រោមស្លាករបស់ក្រុមហ៊ុន Oxford-AstraZeneca វ៉ាក់សាំង Covaxin ដែលត្រូវបានអភិវឌ្ឍដោយក្រុមហ៊ុនឥណ្ឌា Bharat Biotech និងវ៉ាក់សាំង Sputnik V របស់រុស្ស៊ី ។

ក្នុងចំណោមវ៉ាក់សាំងទាំង ៤ នេះ វ៉ាក់សាំង Moderna មានប្រសិទ្ធភាពការពារកូវីដខ្ពស់ជាងគេ ពោលមាន ៩៤ ភាគរយ បើប្រៀបធៀបទៅនឹងវ៉ាក់សាំង Sputnik ៩១ ភាគរយ វ៉ាក់សាំង Covaxin ៧៧.៨ ភាគរយ និងវ៉ាក់សាំង Covishield ៧៤ ភាគរយ ។

ទន្ទឹមនោះ ប្រទេសឥណ្ឌា ក៏កំពុងរំពឹងថានឹងអនុម័តប្រើប្រាស់វ៉ាក់សាំង Pfizer ក្នុងពេលឆាប់ៗនេះផងដែរ ខណៈដំណើរការយល់ព្រមរបស់វ៉ាក់សាំងនេះ គឺស្ថិតនៅក្នុងដំណាក់កាលចុងក្រោយហើយ ។

គួរបញ្ជាក់ថា ប្រទេសឥណ្ឌា បើកយុទ្ធនាការចាក់វ៉ាក់សាំងទ្រង់ទ្រាយធំ កាលពីពាក់កណ្ដាលខែមករា ហើយបានប្រើប្រាស់វ៉ាក់សាំងអស់ ៣២៧ លានដូសហើយ ខណៈមានតែប្រជាជនពេញវ័យ  ៦ ភាគរយប៉ុណ្ណោះ ពោលស្មើនឹង ៥៧ លាននាក់ បានទទួលការចាក់ពេញ ២ ដូស ៕

ប្រែសម្រួលដោយ ៖ ជីវ័ន្ត

ប្រភព ៖ NDTV

ចុចអាន ៖ វ៉ាក់សាំង Moderna មានប្រសិទ្ធភាពប្រឆាំងកូវីដបំប្លែងខ្លួនច្រើនប្រភេទ ជាពិសេស វីរុសឥណ្ឌា