អ្នកឆ្លង Delta មានផ្ទុកមេរោគនៅក្នុងច្រមុះ ច្រើនជាងអ្នកឆ្លងកូវីដទម្រង់ដើម ដល់ទៅ ១,២៦០ ដងឯណោះ

ក្រុមអ្នកស្រាវជ្រាវ ដែលតាមដានការផ្ទុះឡើងនៃជំងឺកូវីដ-១៩ នៅក្នុងប្រទេសចិននាពេលថ្មីៗនេះបានរកឃើញថា អ្នកដែលឆ្លងវីរុសបំប្លែងខ្លួន Delta គឺមានផ្ទុកមេរោគនៅក្នុងច្រមុះ ច្រើនជាង អ្នកដែលបានឆ្លងជំងឺកូវីដ-១៩ ទម្រង់ដើមរហូតដល់ទៅ១,២៦០ ដងឯណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្ទុកវីរុសក្នុងកម្រិតដ៏ខ្ពស់នេះមានន័យថា មេរោគអាចឆ្លងរាលដាលយ៉ាងងាយ ពីមនុស្សម្នាក់ទៅមនុស្សម្នាក់, បង្កើនអត្រាឆ្លងនិងការចូលសម្រាកព្យាបាលក្នុងមន្ទីរពេទ្យ។ នេះបើយោងតាមការសិក្សាដែលចេញផ្សាយលើកដំបូងលើគេហទំព័រ medRxiv នៅដើមខែកក្កដានិងធ្វើបច្ចុប្បន្នភាពកាលពីចុងសប្តាហ៍។

ក្រុមអ្នកស្រាវជ្រាវ នៅមជ្ឈមណ្ឌលត្រួតពិនិត្យនិងបង្ការជំងឺខេត្តក្វាងទុង ប្រទេសចិន បានពិនិត្យមើលមនុស្សដែលឆ្លងវីរុសបំប្លែងខ្លួននេះ ឬក៏ត្រូវបានគេស្គាល់ផងដែរថា B.1.617.2។

ពួកគេរកឃើញថា វីរុសនេះបានបង្កាត់ពូជកាន់តែរហ័ស ហើយពូជមេរោគទាំងនោះ គឺកកើតឡើងក្នុងរយៈពេលខ្លីជាងវីរុសបំប្លែងខ្លួនផ្សេងៗ ដែលគេរកឃើញពីមុន។

ចំណែក លោក Shane Crotty មកពីវិទ្យាស្ថានភាពស៊ាំ La Jolla ក្នុងទីក្រុង San Diego បាននិយាយថា វីរុសបំប្លែងខ្លួន Delta មានលទ្ធភាពយកឈ្នះវីរុសផ្សេងៗទៀតពីព្រោះវា រីករាលដាលយ៉ាងមានប្រសិទ្ធភាព។

នៅសហរដ្ឋអាមេរិក វីរុស Delta បានគ្របដណ្តប់ប្រហែល ៨៣ភាគរយ នៃការឆ្លងថ្មី ខណៈមនុស្ស មិនទាន់ចាក់វ៉ាក់សាំង រងគ្រោះរហូតដល់ទៅជិត៩៧ភាគរយឯណោះ៕

ប្រែសម្រួល៖ Vann Vann

ប្រភព៖ Reuters

ចុចអាន៖ ភាពខុសគ្នានៃរោគសញ្ញាវីរុស Delta ចំពោះអ្នកចាក់វ៉ាក់សាំងរួច និងអ្នកមិនទាន់ចាក់