ការចាក់វ៉ាក់សាំង Sinovac ៣ដូសតែម្តង បញ្ចេញកម្រិតការពារខ្ពស់ជាងការយកវ៉ាក់សាំងប្រភេទ mRNA មកចាក់ជាដូសជំរុញ

ការសិក្សាមួយរបស់ប្រទេសទួរគី លើពលរដ្ឋដែលចាក់វ៉ាក់សាំងរួច ជាង៣០លាននាក់ បានបង្ហាញថា កម្រិតការពារខ្ពស់បំផុត ត្រូវបានគេឃើញនៅក្នុងមនុស្សដែលទទួលវ៉ាក់សាំងអសកម្មចំនួនបីដូស ជាជាងអ្នកដែលបានទទួលវ៉ាក់សាំងអសកម្មពីរដូសហើយ ចាក់វ៉ាក់សាំង mRNA បន្ថែមដូសទី៣។ នេះបើតាមការលើកឡើងរបស់រដ្ឋមន្រ្តីក្រសួងសុខាភិបាលលោក Fahrettin Koca កាលពីថ្ងៃពុធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្វីបើលោករដ្ឋមន្ត្រីមិនបញ្ជាក់ឈ្មោះវ៉ាក់សាំងចំៗក៏ដោយ ក៏ប៉ុន្តែលោកបានសំដៅទៅលើវ៉ាក់សាំងដែលកំពុងប្រើប្រាស់នៅក្នុងប្រទេសទួរគីដែលមានដូចជា វ៉ាក់សាំងអសកម្ម CoronaVac របស់ក្រុមហ៊ុនចិន Sinovac Biotech និងវ៉ាក់សាំងប្រភេទ mRNA ដែលអភិវឌ្ឍដោយក្រុមហ៊ុន Pfizer-BioNTech។

ខណៈពេលដែលជនជាតិទួរគីជាច្រើនចង់ទទួលការចាក់វ៉ាក់សាំង Pfizer ដោយជឿជាក់ថាវាមានប្រសិទ្ធភាពជាងវ៉ាក់សាំងចិននោះ ការស្រាវជ្រាវបានបង្ហាញថា ការប្រើប្រាស់ប្រភេទវ៉ាក់សាំងដូចគ្នាគឺមានប្រសិទ្ធភាពជាង។

ការសិក្សានេះបានធ្វើឡើង ស្របពេលអាជ្ញាធរសុខាភិបាលទួរគីនិងបណ្តាប្រទេសដទៃទៀត បានផ្តល់អនុសាសន៍ថា មនុស្សដែលចាក់វ៉ាក់សាំងអសកម្មពីរដូស ត្រូវទទួលថ្នាំបង្ការប្រភេទ mRNA ជាដូសទីបី ដើម្បីបង្កើនការការពារ។

លោក Koca បាននិយាយថា “ការទទួលវ៉ាក់សាំងបីដូស នៅក្នុងក្រុមដែលបានកំណត់ គឺមានសារៈសំខាន់ខ្លាំងណាស់។ ប្រជាជននៅជុំវិញពិភពលោក នឹងសិក្សាទិន្នន័យនេះជាលើកដំបូង ហើយគោលនយោបាយចាក់ថ្នាំបង្ការរបស់ប្រទេសនានា ប្រហែលជានឹងផ្លាស់ប្តូរ”។

គួរបញ្ជាក់ថា ប្រទេសទួរគី បានទទួលវ៉ាក់សាំង Sinovac រាប់លានដូស ចាប់តាំងពីដើមឆ្នាំមក ហើយបើកយុទ្ធនាការចាក់យ៉ាងទូលំទូលាយ ដោយចាប់ផ្តើមពីមនុស្សចាស់៕

ប្រែសម្រួល៖ Vann Vann

ប្រភព៖ Asian Nikkei

ចុចអាន៖ ចិន សម្រុកចាក់វ៉ាក់សាំងដល់ក្មេងជំទង់ ត្រៀមបើកបវេសនការឆ្នាំសិក្សាថ្មីនាដើមខែកញ្ញា