វីដេអូស្តែងៗ ក្រុមតាលីបង់ ចាប់ចងដៃ បិទមុខមេប៉ូលិស មុនពេលបាញ់សម្លាប់

ចាប់តាំងពីការវាយដណ្តើមយកប្រទេសអាហ្វហ្គានីស្ថានមកវិញ ក្នុងល្បឿនមិនគួរឲ្យជឿ ក្រុមតាលីបង់បានបន្តវាយលុកយ៉ាងក្តៅគគុក។

ពួកគេទទូចថា ពួកគេគឺជាអង្គការថ្មី មិនមែនជាពួកជីហាដដ៏ឃោរឃៅកាលពី ២០ ឆ្នាំមុនដែលបានគាបសង្កត់ស្ត្រីនិងចងសម្ព័ន្ធជាមួយភេរវករអាល់កៃដានោះទេ។ ឥឡូវ​ ពួកគេគឺជាតាលីបង់ ២.០ ថ្មី ដែលនឹងគោរពសេរីភាព សមភាពនិងមនុស្សជាតិជាមូលដ្ឋាន។

ប៉ុន្តែពេលនេះ ការកុហកទាំងនោះត្រូវបានលាតត្រដាង ហើយមេដឹកនាំថ្មីរបស់អាហ្វហ្គានីស្ថានបានបង្ហាញឲ្យឃើញនូវអ្វី ដែលឃោរឃៅដូចកាលពីពីរទសវត្សរ៍មុនដែរ។

អង្គការលើកលែងទោសអន្តរជាតិ បានបង្ហាញថា យុទ្ធជនតាលីបង់ បានសម្លាប់រង្គាលបុរសជនជាតិ Hazara ចំនួន ៩ នាក់បន្ទាប់ពីបានកាន់កាប់ខេត្ត Ghazni កាលពីខែមុន ហើយក៏មានសាក្សីឃើញហេតុការណ៍ផ្ទាល់ភ្នែកបានរៀបរាប់ពីការសម្លាប់នេះផងដែរ។

បុរសចំនួន៦នាក់ត្រូវបានបាញ់សម្លាប់ និង៣នាក់ទៀតត្រូវបានធ្វើទារុណកម្មរហូតដល់ស្លាប់ ក្នុងនោះមានបុរសម្នាក់ដែលត្រូវបានគេយកកន្សែងបិទមុខ និងកាត់សាច់ដុំដៃ ក្នុងអំឡុងពេលនៃអំពើឃោរឃៅដែលបានកើតឡើងនៅចន្លោះថ្ងៃទី ៤ ដល់ថ្ងៃទី ៦ ខែកក្កដា ក្នុងភូមិ Mundarakht នៃស្រុក Malistan។

បើទោះបីជាអង្គការនេះ អះអាងថា ខ្លួននឹងមិនស្វែងរកការសងសឹកចំពោះអ្នកដែលប្រយុទ្ធប្រឆាំងនឹងអំណាចរបស់ពួកគេក៏ដោយ ក៏មេប៉ូលិសប្រចាំតំបន់ម្នាក់ដែលប្រឆាំងពួកគេ ត្រូវបានសម្លាប់ដោយឈាមត្រជាក់។

វីដេអូឃ្លីបដ៏គួរឲ្យរន្ធត់មួយ ដែលកំពុងត្រូវបានចែកចាយនៅលើអ៊ិនធើណិត បានបង្ហាញពីលោកឧត្តមសេនីយ៍ Haji Mullah Achakzai មេប៉ូលិសខេត្ត Badghis ត្រូវបានគេចាប់ចងដៃ និងបិទមុខ មុនពេលត្រូវបានបាញ់សម្លាប់ដោយគ្រាប់កាំភ្លើង ជាច្រើនគ្រាប់។

មេបញ្ជាការរូបនេះ ត្រូវបានចាប់ខ្លួនដោយក្រុមតាលីបង់ បន្ទាប់ពីពួកគេដណ្តើមបានតំបន់នោះ នៅក្បែរព្រំដែនប្រទេស តួកម៉េនីស្ថាន ក្នុងការវាយលុកដូចផ្លេកបន្ទោរកាលពីសប្តាហ៍មុន៕

វីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ តើច្បាប់ Sharia ដ៏តឹងរ៉ឹងរបស់ក្រុមតាលីបង់ គឺជាអ្វី?