Delta មិនថយ វៀតណាម អនុម័តវ៉ាក់សាំងកូវីដ ចាក់៣ដូស របស់គុយបា

ក្រសួងសុខាភិបាលវៀតណាម បានអនុម័តឲ្យប្រើប្រាស់វ៉ាក់សាំងកូវីដ Abdala របស់ប្រទេសគុយបា ខណៈករណីឆ្លងដែលបណ្តាលមកពីវីរុសបំប្លែងខ្លួន Delta នៅតែបន្តកើនឡើងនៅក្នុងប្រទេសអាស៊ីអាគ្នេយ៍មួយនេះ។

Abdala គឺជាវ៉ាក់សាំងទី ៨ ដែលត្រូវបានអនុម័តឲ្យប្រើប្រាស់នៅវៀតណាម ខណៈប្រទេសនេះ ស្ថិតក្នុងចំណោមប្រទេសមានអត្រាចាក់វ៉ាក់សាំងទាបបំផុតនៅក្នុងតំបន់ ពោលមានត្រឹម៦,៣ភាគរយប៉ុណ្ណោះនៃប្រជាជន៩៦លាននាក់របស់ខ្លួន ដែលទទួលបានវ៉ាក់សាំងពេញលេញ។

ប៉ុន្មានម៉ោងបន្ទាប់ពីប្រធានាធិបតីវៀតណាមលោក Nguyen Xuan Phuc ចាកចេញពីរដ្ឋធានីហាណូយ ទៅបំពេញទស្សនកិច្ចផ្លូវការនៅទីក្រុង Havana, រដ្ឋាភិបាលវៀតណាមបាននិយាយនៅក្នុងសេចក្តីថ្លែងការណ៍មួយថា “ក្រសួងសុខាភិបាលបានអនុម័តវ៉ាក់សាំង Abdala ដោយផ្អែកលើតម្រូវការបន្ទាន់របស់ប្រទេស សម្រាប់ការប្រយុទ្ធប្រឆាំងនឹងកូវីដ-១៩”។

ក្រសួងសុខាភិបាលវៀតណាមបាននិយាយកាលពីខែមុនថា គុយបានឹងផ្គត់ផ្គង់វ៉ាក់សាំង Abdala ក្នុងបរិមាណដ៏ច្រើន ដល់ប្រទេស និងផ្ទេរបច្ចេកវិទ្យាផលិតកម្មនៅចុងឆ្នាំនេះ។ គុយបា អះអាងថា វ៉ាក់សាំងចាក់៣ដូសរបស់ខ្លួន មានប្រសិទ្ធភាព ៩២,២៨ ភាគរយ។

គួរបញ្ជាក់ថា ប្រទេសវៀតណាមបានរាយការណ៍ ករណីឆ្លងជំងឺកូវីដ-១៩ជិត ៦៧៨,០០០ករណីនិងការស្លាប់ជាង ១៦,០០០ នាក់ចាប់តាំងពីរោគរាតត្បាតផ្ទុះឡើង៕

ប្រែសម្រួល៖ Vann Vann

ប្រភព៖ FT

ចុចអាន៖ វៀតណាម ឲ្យយកមនុស្សទៅធ្វើតេស្តថ្នាំព្យាបាលកូវីដរបស់បារាំង ជាថ្នូរទទួលយកបច្ចេកវិទ្យា