ក្រសួងសុខាភិបាល ជំរុញឱ្យពលរដ្ឋទៅទទួលវ៉ាក់សាំងការពារជំងឺកូវីដ-១៩ ថ្មី ដើម្បីទប់ស្កាត់ការរីករាលដាលក្នុងសហគមន៍

ដោយរកឃើញមានការឆ្លងដោយកន្លែងនៃជំងឺកូវីដ-១៩ ថ្មី (JN.1 lineages) (Covid-19 Omicron) កន្លងមក ក្រសួងសុខាភិបាល បានជំរុញលើកទឹកចិត្ត ឱ្យប្រជាពលរដ្ឋទៅទទួលវ៉ាក់សាំងដើម្បីការពារជំងឺកូវីដ-១៩ ថ្មី ជាពិសេសពលរដ្ឋដែលមានអាយុចាប់ពី ១២ឆ្នាំឡើង ដើម្បីបង្ការជាមុនសំដៅ ធានាភាពស៊ាំសហគមន៍ទប់ស្កាត់ការរីករាលដាលនៃជំងឺកូវីដ-១៩ ឆ្នាំ២០២៥។ នេះបើយោងតាមប្រកាសរបស់ក្រសួងសុខាភិបាល ចុះថ្ងៃទី១៨ ខែឧសភា ឆ្នាំ២០២៥។

តាមរយៈលិខិតនេះ ក្រសួងសុខាភិបាល បានណែនាំឱ្យ នាយកមន្ទីរពេទ្យជាតិ និងប្រធានមន្ទីរសុខាភិបាល នៃរដ្ឋបាលរាជធានី ខេត្ត និងផ្នែកពាក់ព័ន្ធ ជំរុញការចាក់វ៉ាក់សាំងកូវីដ-១៩ និងរំលឹកដល់ប្រជាជនអាយុចាប់ពី ១២ឆ្នាំឡើង រាល់ ៦ខែ ម្តងតាមយុទ្ធសាស្ត្រនៃការចាក់រំលឹកវ៉ាក់សាំងកូវីដ-១៩ ជាពិសេសលើកទឹកចិត្តឱ្យមកទទួលវ៉ាក់សាំងដើម្បីការពារជំងឺកូវីដ-១៩ ថ្មី សម្រាប់ជនវ័យចាស់ ជនចាស់ជរា អ្នកមានជំងឺរ៉ាំរ៉ៃ និងមានភាពស៊ាំថយចុះជាដើម។ ដោយផ្តល់វ៉ាក់សាំងកូវីដ-១៩ ជាប្រចាំនៅគ្រប់មូលដ្ឋានសុខាភិបាលសាធារណៈរួមមានមន្ទីរពេទ្យជាតិ និងមណ្ឌលសុខភាព។ ព្រមទាំងផ្តល់វ៉ាក់សាំងកូវីដ-១៩ ដោយរួមបញ្ចូលជាមួយសកម្មភាពចុះផ្តល់សេវាសុខភាពមូលដ្ឋាន។

បើតាមសេចក្ដីប្រកាសព័ត៌មានរបស់ក្រសួងសុខាភិបាល កាលពីពេលកន្លងទៅ បានឱ្យដឹងថា ស្ថានភាពនៃការចម្លងវីរុសកូវីដ-១៩ នៅតែបន្តមាន ខណៈពពួកអូមីក្រុងបំប្លែងថ្មីប្រភេទជេអ៉ិន.១​ (JN.1) បានរីករាលដាលយ៉ាងឆាប់រហ័សនៅក្នុងតំបន់ជាច្រើននៅទូទាំងពិភពលោក។

សូមជម្រាបដែរថា កាលពីថ្ងៃទី១៧ ខែឧសភា ឆ្នាំ២០២៥នេះ ក្រសួងសុខាភិបាល បានប្រកាសពីការរកឃើញជំងឺកូវីដ-១៩ ឆ្លងថ្មីចំនួន៦ នាក់៕