តើថ្នាំគ្រាប់របស់ក្រុមហ៊ុន Pfizer មានប្រសិទ្ធភាពការពារកូវីដ-១៩បានកម្រិតណា?

កាលពីដើមខែកញ្ញា ក្រុមហ៊ុន Pfizer-Biotech បានចាប់ផ្តើមការពិសោធន៍ព្យាបាលអ្នកជំងឺកូវីដ-១៩ តាមរយៈថ្នាំលេប ឈានដល់ដំណាក់កាលចុងក្រោយ ខណៈលទ្ធផលសាកល្បងបានបញ្ចេញជាវិជ្ជមាន និងផ្ដល់ក្ដីសង្ឃឹមថ្មីមួយទៀតដល់ពិភពលោក បន្ទាប់ពីវ៉ាក់សាំង។

ទន្ទឹមនឹងនេះ សាធារណជនមួយចំនួន កើតមានចម្ងល់ខ្លះៗពាក់ព័ន្ធជាមួយថ្នាំគ្រាប់ Pfizer ថាពិតជាអាចការពារវីរុសកូវីដ-១៩បានឬយ៉ាងណា? មកស្វែងយល់ទាំងអស់គ្នា!

តើថ្នាំគ្រាប់ Pfizer ជាអ្វី?

វាជាថ្នាំប្រឆាំងវីរុសដែលអាចការពារការឆ្លងមេរោគកូវីដ-១៩ បន្ទាប់ពីមនុស្សម្នាក់បានប៉ះពាល់ផ្ទាល់ដោយវីរុស។ Pfizer បានចាប់ផ្តើមគម្រោងផលិតថ្នាំរបស់ខ្លួនដែលឱ្យឈ្មោះថា PF-07321332 កាលពីខែមីនា ឆ្នាំ ២០២០ ហើយបន្ទាប់មកបានធ្វើតេស្តព្យាបាលដោយផ្សំគ្នាជាមួយថ្នាំ ritonavir (ថ្នាំព្យាបាលមេរោគអេដស៍)។ យោងតាមលទ្ធផលពីមន្ទីរពិសោធន៍ ថ្នាំគ្រាប់នេះអាចរារាំងការចម្លងមេរោគ ការពារអាការធ្ងន់ធ្ងរ និងអាចឈប់ការចម្លងទាំងស្រុងតែម្ដង។

ការធ្វើតេស្តគ្លីនិក

បន្ទាប់ធ្វើតេស្តគ្លីនិក ក្រុមហ៊ុនឱសថយក្សមួយនេះ បានបន្តធ្វើតេស្តសុវត្ថិភាព និងប្រសិទ្ធភាពនៃថ្នាំគ្រាប់របស់ខ្លួន ជាមួយថ្នាំ ritonavir ទៅលើមនុស្សពេញវ័យដែលមានសុខភាពល្អចំនួន ២,៦៦០ នាក់។ បើយោងតាមរបាយការណ៍របស់ទស្សនាវដ្តី Forbes ការសាកល្បងនេះគឺដើម្បីវាយតម្លៃថា តើថ្នាំប្រឆាំងវីរុស PF-07321332 អាចការពារការឆ្លងមេរោគកូវីដបានកម្រិតណា។

ដំណើរការរបស់ថ្នាំ

អ្នកជំងឺដែលចូលរួមក្នុងការសាកល្បងត្រូវបានផ្តល់ឱ្យលេបថ្នាំ PF-07321332 ផ្សំជាមួយថ្នាំ ritonavir ក្នុងកម្រិតទាប។ អ្នកជំងឺ១ភាគ៣ នៃការធ្វើតេស្តនឹងទទួលបានថ្នាំ placebo ហើយអ្នកជំងឺដែលនៅសល់នឹងទទួលបានថ្នាំលេប Pfizer ពីរដងក្នុងមួយថ្ងៃ រយៈពេល ៥-១០ ថ្ងៃ។ លទ្ធផលនៃការសាកល្បងដំណាក់កាលដំបូងបានបង្ហាញថា ថ្នាំគ្រាប់នេះ មានសុវត្ថិភាព និងស៊ាំបានល្អ។

ក្រុមហ៊ុនសង្ឃឹមថា ថ្នាំ PF-07321332  នឹងរារាំងសកម្មភាពរបស់អង់ហ្ស៊ីមសំខាន់ដែលជាភ្នាក់ងារចម្លងវីរុស និងជួយបញ្ឈប់មេរោគមុនពេលវាវិវត្តខ្លួនក្នុងរាងកាយមនុស្ស។

តើយើងនឹងបានប្រើវានៅពេលណា?

ប្រសិទ្ធរបស់ថ្នាំគ្រាប់នេះ មិនទាន់ប្រកាសជាផ្លូវការទេ បើវាជោគជ័យ អាចនឹងមានលក់នៅលើទីផ្សារនៅចុងឆ្នាំនេះ។ យោងតាមរបាយការណ៍របស់ទូរទស្សន៍ CNBC បានឱ្យដឹងថា Pfizer ចាប់ផ្តើមធ្វើការសាកល្បងថ្នាំលេបលើមនុស្ស កាលខែមីនា ឆ្នាំ ២០២១ ដោយមានគម្រោងបញ្ជប់វានៅចុងឆ្នាំដដែល៕

ប្រែសម្រួល៖ សន្យា

ប្រភព៖ NEWS18

ចុចអាន៖ ថ្នាំកូវីដលេបមួយថ្ងៃមួយគ្រាប់របស់ ជប៉ុន ឈានដល់ការសាកល្បងព្យាបាលជាសះស្បើយត្រឹម ៥ ថ្ងៃ

ចុចអាន៖ ឆ្នាំក្រោយ ពិភពលោក មានថ្នាំព្យាបាលកូវីដហើយ!