ភូកេត បើកឲ្យភ្ញៀវទេសចរចាក់វ៉ាក់សាំងការពារកូវីដពេញលេញ ចូលលេងលម្ហែបាន

រដ្ឋាភិបាលថៃបានប្រកាសថា អ្នកដំណើរដែលចាក់វ៉ាក់សាំងការពារជំងឺកូវីដ-១៩ពេញលេញមកពីគ្រប់ប្រទេស អាចមកលេងលម្ហែនៅ ភូកេត បានហើយ។

ឧស្សាហកម្មទេសចរណ៍របស់ប្រទេសថៃ បានធ្លាក់ចុះយ៉ាងខ្លាំង ដោយការរីករាលដាលនៃមេរោគឆ្លងនិងការរឹតត្បិតដែលពាក់ព័ន្ធ បានកាត់បន្ថយចំនួនភ្ញៀវទេសចរពី ៤០ លាននាក់ក្នុងឆ្នាំ ២០១៩ មកកម្រិតទាបបំផុត ក្នុងរយៈពេលពីរឆ្នាំចុងក្រោយនេះ។

ប្រទេសថៃ បានដាក់ចេញនូវគ្រោងការណ៍ “Sandbox” កាលពីខែកក្កដា ដែលអនុញ្ញាតឲ្យអ្នកទេសចរទទួលថ្នាំបង្ការពេញលេញមកពីប្រទេសដែលចាត់ទុកថាមានហានិភ័យទាបទៅមធ្យម អាចធ្វើដំណើរបានដោយសេរីនៅលើកោះដ៏ពេញនិយមមួយនេះ រយៈពេលមួយសប្តាហ៍ ហើយបន្ទាប់មកអាចធ្វើដំណើរទៅកាន់ដីគោកដោយគ្មានការធ្វើចត្តាឡីស័ក។

អាជ្ញាធរទេសចរណ៍ថៃ បានប្រកាសកាលពីល្ងាចថ្ងៃសុក្រទី ១ ខែតុលាថា គម្រោងនេះត្រូវបានពង្រីកបន្ថែមលើប្រទេសចំនួន ៨០ ដែលមានសិទ្ធិរួចទៅហើយ។

អ្នកនាំពាក្យក្រសួងការបរទេស លោក Tanee Sangrat បាននិយាយថា កុមារដែលមិនបានចាក់វ៉ាក់សាំង ក៏នឹងអាចធ្វើដំណើរជាមួយឪពុកម្តាយរបស់ពួកគេ ដែលបានចាក់វ៉ាក់សាំងការពាររួចហើយផងដែរ។

គួរបញ្ជាក់ថា កម្មវិធី Sandbox បានទាក់ទាញភ្ញៀវទេសចរជាង ៣៨,០០០ នាក់រួចទៅហើយ ទៅកាន់ឆ្នេរខ្សាច់ពណ៌សនៃកោះភូកេត ហើយអាចរកចំណូលបាន ៦៦.៦៧ លានដុល្លារអាមេរិក៕

ប្រែសម្រួល៖ សន្យា

ប្រភព៖ CNA

ចុចអាន៖ ថៃ ព្រមានខេត្តចំនួន ៣ ឲ្យប្រយ័ត្នខ្លួនចំពោះ គ្រោះទឹកជំនន់

ចុចអាន៖ កូនស្រីលោក Duterte ឈរឈ្មោះបោះឆ្នោត ប្រធានាធិបតី ហ្វីលីពីន