(វីដេអូ) មានពពុះពុលពេញទន្លេប៉ុណ្ណឹងហើយ ប្រជាជនឥណ្ឌា នៅតែជ្រមុជទឹក ដើម្បី​ប្រារព្ធ​ពិធីបុណ្យសាសនា

កាលពីថ្ងៃចន្ទ ទន្លេដ៏បរិសុទ្ធបំផុតមួយរបស់ប្រទេសឥណ្ឌា ត្រូវបានគ្របដណ្តប់ដោយពពុះពុល ដែលនេះជាការបន្ថែមភាពលំបាកដល់អ្នកក្រុងញូវដេលី ខណៈពួកគេស៊ូទ្រាំនឹងផ្សែងអ័ព្ទដ៏ក្រាស់ពាសពេញរដ្ឋធានីរួចទៅហើយ។

Yamuna គឺជាផ្លូវទឹកមួយក្នុងចំណោមផ្លូវទឹកដែលរងការបំពុលខ្លាំងបំផុតនៅក្នុងប្រទេស ប៉ុន្តែផ្នែកខ្លះនៃទន្លេដែលហូរកាត់កណ្តាលទីក្រុង ដេលី ត្រូវបានគ្របដណ្តប់ដោយពពុះពណ៌ ស ស្រដៀងទៅនឹងព្រិល។

រដ្ឋាភិបាលទីក្រុង បានស្តីបន្ទោសបញ្ហានេះទៅលើ “ទឹកស្អុយ និងកាកសំណល់ឧស្សាហកម្ម” ដែលបានបង្ហូរចូលទៅក្នុងទន្លេ កាលពីសប្តាហ៍មុន។

ទោះបីជាយ៉ាងណាក៏ដោយ វា​មិន​បាន​រារាំង​អ្នក​គោរព​សាសនា​ហិណ្ឌូ​មួយ​ចំនួន ​ពី​ការជ្រមុជ​ទឹក​ក្នុង​ទន្លេ​ដើម្បី​ប្រារព្ធ​ពិធីបុណ្យ Chhath Puja ដែល​មាន​រយៈពេល​បួន​ថ្ងៃ ​ដើម្បី​ថ្វាយ​ការ​អធិស្ឋាន​ដល់​ព្រះអាទិត្យ​នោះ​ទេ។

ប៉ុន្តែ​ការ​បំពុល​នេះ ​បាន​រំខាន​ដល់​ការ​ផ្គត់ផ្គង់​ទឹក ទៅកាន់​ផ្នែក​មួយ​នៃ​ទីក្រុង។

មន្ត្រី​ឥណ្ឌា​បាន​សន្យា​ជា​យូរ​មក​ហើយ​ថា ​នឹង​សម្អាត​ទន្លេ Yamuna ប៉ុន្តែ​មិន​បាន​ជោគជ័យទេ ហើយ​ពពុះ​ពុល​បាន​ក្លាយ​ជា​រឿង​ប្រចាំ​ឆ្នាំ។

របាយការណ៍របស់រដ្ឋាភិបាលឆ្នាំ២០២០ បានរកឃើញថា គុណភាពទឹកនៅក្នុងទន្លេ បានប្រែក្លាយទៅភាពកាន់តែធ្ងន់ធ្ងរឡើងៗ ក្នុងរយៈពេល៥ឆ្នាំចុងក្រោយនេះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ AFP

ចុចអាន៖ ពិធីបុណ្យដុតផាវ Diwali កំពុងធ្វើឲ្យគុណភាពខ្យល់អាប់អួរពេញទីក្រុង ឥណ្ឌា