សិង្ហបុរី មានឧបករណ៍តេស្ត PCR រកឃើញទាំង Omicron និងវីរុសបំប្លែងខ្លួនសាហាវមួយទៀត

ឧបករណ៍តេស្ត PCR ផលិតដោយក្រុមហ៊ុនបច្ចេកវិទ្យាវេជ្ជសាស្រ្ត Acumen Diagnostics របស់សិង្ហបុរីមានសមត្ថភាពអាចរកឃើញទាំងវីរុសបំប្លែងខ្លួន Omicron និង Delta ។

ឧបករណ៍ធ្វើតេស្ត PCR ចំនួន ២ គឺ Acu-Corona 2.0 និង Acu-Corona Duplex ដែលអាចរកឃើញវីរុស Delta ក៏អាចកំណត់វីរុស Omicron ផងដែរ ខណៈឧបករណ៍ទាំងនេះត្រូវបានប្រើប្រាស់រួចហើយនៅ ក្នុងប្រទេសសិង្ហបុរី ។

ការធ្វើតេស្តរបស់ឧបករណ៍ Acu-Corona 2.0 កំណត់គោលដៅ ហ្សែនកូវីដចំនួន ២ គឺ RdRp និង E ដែលមានវត្តមាននៅ ក្នុងវីរុស Omicron និង Delta ។

ចំណែកការធ្វើតេស្តរបស់ឧបករណ៍ Acu-Corona Duplex ផ្តោតលើហ្សែន E និងហ្សែន S ។ ផ្នែកនៃហ្សែន S ដែលត្រូវបានកំណត់គោលដៅ ដោយការធ្វើតេស្ត មិនមានការវិវត្តណាមួយក្នុងចំណោមការវិវត្តចំនួន ៣២ នៅ ក្នុងវីរុស Omicron នោះទេ ដូច្នេះវាអាចរកឃើញវីរុសបំប្លែងខ្លួនមួយនេះ ដោយមិនបាត់បង់ភាពប្រែប្រួលណាមួយឡើយ ។

ទន្ទឹមនោះ ក្រុមហ៊ុន Acumen Diagnostics បាននិយាយកាលពីថ្ងៃសុក្រថា ចាប់តាំងពីឧបករណ៍ទាំងនេះត្រូវបានផលិតនៅ ក្នុងស្រុក ពួកគេអាចត្រូវបានគេដាក់ពង្រាយយ៉ាងឆាប់រហ័ស និងមានតម្លៃប្រហែលពាក់កណ្តាលនៃតម្លៃដែលបាននាំចូល ។

គួរបញ្ជាក់ថា បច្ចុប្បន្នក្រុមហ៊ុននេះបានដំណើរការបន្ទប់ពិសោធន៍ចំនួន ២ ដែលអាចប្រើសម្រាប់ការធ្វើតេស្តរោគវិនិច្ឆ័យចំនួន ៧,០០០ ករណីជារៀងរាល់ថ្ងៃ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation

ចុចអាន ៖ Omicron ចូលដល់ប្រទេសអាស៊ានមួយទៀតហើយ