ចិន​ថា​ អាមេរិក​​បំពាន​ច្បាប់អន្តរជាតិ​ធ្ងន់ធ្ងរពី​ការ​អនុម័តច្បាប់​ហាម​ទំនិញ​ពីស៊ីនជាំង

ប្រទេសចិនបានចាត់ទុកការអនុម័តច្បាប់នាំចូលទំនិញដែលចោទផលិតបង្ខំនៅទីក្រុងស៊ីនជាំងគឺជាការបំពានយ៉ាងធ្ងន់ធ្ងរលើច្បាប់អន្តរជាតិ និងបទដ្ឋាននៃទំនាក់ទំនងអន្តរជាតិ ហើយជ្រៀតជ្រែកកិច្ចការផ្ទៃក្នុងរបស់ចិន។

ប្រធានាធិបតីសហរដ្ឋអាមេរិក លោក ចូ បៃដិន កាលពីថ្ងៃព្រហស្បតិ៍ម្សិលមិញបានចុះហត្ថលេខាជាផ្លូវការហើយលើច្បាប់ហាមនាំចូលទំនិញដែលចោទផលិតដោយកម្លាំងបង្ខំនៅទីក្រុងស៊ីនជាំង ប្រទេសចិន។ នេះបើយោងតាមសេតវិមានបាននិយាយដែលបង្កឲ្យចិនថ្កោលទោស។

ច្បាប់ការពារការងារដោយបង្ខំជនជាតិភាគតិច Uyghur ជាផ្នែកនៃការដាក់បន្ទុករបស់អាមេរិកប្រឆាំងនឹងការអនុវត្តរបស់ទីក្រុងប៉េកាំងលើជនជាតិមូស្លីមភាគតិចនៅចិន ដែលរដ្ឋាភិបាលក្រុងវ៉ាស៊ីនតោនហៅថា អំពើប្រល័យពូជសាសន៍។

ច្បាប់នេះត្រូវបានសភាអនុម័តកាលពីប៉ុន្មានថ្ងៃមុន បន្ទាប់ពីសមាជិកសភាបានឈានដល់ឯកភាពរវាងសភា និងព្រឹទ្ធសភា។

គន្លឹះសំខាន់ចំពោះច្បាប់នេះគឺជាការសន្មតមិនអាចប្រកែកបានដែលទំនិញទាំងអស់ពីទីក្រុងស៊ីនជាំងជាកន្លែងដែលទីក្រុងប៉េកាំងបង្កើតជំរំឃុំឃាំងសម្រាប់ជនជាតិ Uyghurs និងក្រុមមូស្លីមផ្សេងៗទៀតដែលត្រូវបានធ្វើឡើងដោយបង្ខំ។ វាត្រូវបានហាមឃាតការនាំចូល លុះត្រាវាអាចត្រូវបានបញ្ជាក់មូលហេតុផ្សេងទៀត។

ទំនិញមួយចំនួនដូចជា កប្បាស ប៉េងប៉ោះ និងប៉ូលីស៊ីលីកុនប្រើក្នុងការផលិតបន្ទះសូឡាត្រូវបានរៀបចំអាទិភាពសម្រាប់ការអនុវត្តច្បាប់។

ជុំវិញការចោទប្រកាន់របស់អាមេរិកត្រូវបានប្រទេសចិនបដិសេធ។

លោក Liu Pengyu អ្នកនាំពាក្យក្រសួងការបរទេសចិនបាននិយាយក្នុងសេចក្តីថ្លែងការណ៍តាមអ៉ីមែលថា ៖«នេះគឺជាការបំពានយ៉ាងធ្ងន់ធ្ងរលើច្បាប់អន្តរជាតិ និងបទដ្ឋាននៃទំនាក់ទំនងអន្តរជាតិ ហើយជ្រៀតជ្រែកកិច្ចការផ្ទៃក្នុងរបស់ចិន។ ប្រទេសចិនថ្កោលទោសយ៉ាងម៉ឺងម៉ាត់ និងជំទាស់ដាច់អហង្កា»។

លោកបាននិយាយថា ចិននឹងឆ្លើយតបបន្ថែមទៀតនៅក្នុងពន្លឺនៃការអភិវឌ្ឍស្ថានភាព ប៉ុន្តែលោកមិនបានបញ្ជាក់លំអិតឡើយ៕

ប្រែសម្រួល៖ វីរបុត្រ
ប្រភព៖ Reuters