អ្នកជំនាញថៃ​ ព្រមានថា កុមារជាមុខព្រួញ ចម្លងអូមីក្រុង រីករាលដាល ក្នុងពេលឆាប់ៗ

កុមារមិនចាក់វ៉ាក់សាំងអាចបង្កជាចង្កោមចម្លងជំងឺកូវីដ១៩ ជាពិសេសជាមួយនឹងវីរុសបំប្លែងថ្មី អូមីក្រុង ដែលមានសមត្ថភាពឆ្លងខ្លាំង។ នេះបើតាមការព្រមានពីអ្នកជំនាញខាងមេរោគថៃ លោកវេជ្ជបណ្ឌិត Yong Poovorawan។

លោក​បាននិយាយក្នុងការបង្ហោះ Facebook នៅថ្ងៃចន្ទទី១០ខែមករានេះថា កុមារ​ដែល​ឆ្លង​ជំងឺ​កូវីដ១៩ នឹង​មាន​រោគ​សញ្ញា​ស្រាល ឬ​មិន​មានរោគសញ្ញា ជាមួយ​ហានិភ័យ​ស្លាប់​ទាប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ លោកព្រមានថា “កុមារអាចក្លាយជាអ្នកឆ្លងរាលដាលខ្លាំងបំផុត ដោយសារពួកគេនឹងចម្លងមេរោគទៅឪពុកម្តាយរបស់ពួកគេ”។

ស្របពេលជាមួយគ្នានោះដែរ លោក Yong បានព្យាករណ៍ថា ឆាប់ៗនេះ ចង្កោមកូវីដនឹងផ្ទុះឡើងនៅក្នុងសាលារៀន ខណៈដែលកុមារនឹងមានការប្រាស្រ័យទាក់ទងគ្នាទៅវិញទៅមក បន្ទាប់ពីចំណាយពេលរៀនអនឡាញច្រើនខែនៅផ្ទះ។

លោកបន្តថា “ដូច្នេះ វ៉ាក់សាំងកូវីដដែលចាក់ជូនកុមារ ត្រូវតែមានប្រសិទ្ធភាពខ្ពស់ដើម្បីធានាថា ពួកគេមិនមានការឆ្លងនិងចម្លងមេរោគទៅអ្នកដទៃនោះទេ”។

“មនុស្សពេញវ័យក៏គួរតែកសាងភាពស៊ាំរបស់ពួកគេប្រឆាំងនឹងកូវីដផងដែរ ដោយការទទួលថ្នាំបង្ការ ដូច្នេះកុមារអាចវិលត្រឡប់ទៅជីវិតធម្មតាវិញបាន”៕

ប្រែសម្រួល៖ Vann Vann

ប្រភព៖ Nation

ចុចអាន៖ ក្រុមហ៊ុន Moderna ចាប់ផ្តើមធ្វើតេស្តវ៉ាក់សាំងកូវីដលើទារកនិងកុមារ