Breaking News! ផ្ទុះការវាយប្រហារនៅរោងចក្រមីស៊ីល អ៊ុយក្រែន

ទាហានឆ្មាំជាតិអ៊ុយក្រែនម្នាក់ បានប្រើ​កាំភ្លើង​ AK-47 បើកការបាញ់ប្រហារទៅលើសន្តិសុខនៅរោងចក្រយោធាមួយ កណ្តាលប្រទេសអ៊ុយក្រែនទាំងមិនដឹងមូលហេតុ ដោយបានសម្លាប់មនុស្ស៥នាក់ និងរបួស៥នាក់ផ្សេងទៀត មុនពេលរត់គេចខ្លួន។

ការ​វាយ​ប្រហារ​នេះ ​កើត​ឡើងចំ​ពេល​ដ៏​រសើប​សម្រាប់​យោធា​អ៊ុយក្រែនខណៈ យោធារុស្ស៊ីបាននិងកំពុងប្រមូលផ្តុំកងទ័ពនៅជិតព្រំដែនអ៊ុយក្រែន ហើយសមាជិកអង្គការណាតូ បានចោទប្រកាន់រុស្ស៊ីពីបទរៀបចំផែនការវាយចូលប្រទេសនេះ។

សេចក្តីថ្លែងការណ៍របស់ប៉ូលិសបានឲ្យដឹងថា ឧប្បត្តិហេតុនេះបានកើតឡើងនៅម៉ោង ៣:៤០ព្រឹក (ម៉ោងនៅអ៊ុយក្រែន) ថ្ងៃព្រហស្បតិ៍ទី២៧ខែមករា ក្នុងទីក្រុង Dnipro នៅរោងចក្រមីស៊ីល Pivdenmash។

ខណៈពេលនេះ ប៉ូលិសកំពុងស្វែងរកទាហានដែលរត់គេចខ្លួន។ យោងតាមប៉ូលិស គាត់មានគ្រាប់ចំនួន ២០០បង់នៅក្នុងខ្លួន។

ក្រសួងមហាផ្ទៃបាននិយាយថា “ហេតុផលសម្រាប់ឧក្រិដ្ឋកម្មនេះ នៅមិនទាន់ដឹងនៅឡើយទេ”។ ក្រសួងបន្ថែមថា មេបញ្ជាការឆ្មាំជាតិលោក Nikolai Balan ត្រូវបានបញ្ជូនទៅកាន់កន្លែងកើតហេតុ៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ រឿងទាំងនេះនឹងកើតឡើងបើ រុស្ស៊ី វាយ អ៊ុយក្រែន មែន