អ៊ុយក្រែន អួតថា ពេលនេះមានអាវុធ អាមេរិក ក្នុងដៃរួចជាស្រេច

រដ្ឋមន្ត្រីក្រសួងការពារជាតិអ៊ុយក្រែនលោក Oleksii Reznikov បាននិយាយកាលពីថ្ងៃសុក្រថា យោធាអ៊ុយក្រែនបានទទួលសព្វាវុធដែលផ្តល់ដោយសហរដ្ឋអាមេរិករួចហើយដែលជាផ្នែកនៃកញ្ចប់ជំនួយយោធាថ្មីបំផុត ។

កាលពីចុងខែធ្នូ ប្រធានាធិបតី Joe Biden បានអនុម័តកញ្ចប់ជំនួយសន្តិសុខចំនួន ២០០ លានដុល្លារសម្រាប់អ៊ុយក្រែន ដែលរួមមានជំនួយការពារជាតិដ៍សាហាវដូចជា មីស៊ីលប្រឆាំងរថក្រោះ Javelin និងគ្រាប់កាំភ្លើងជាដើម ។

ទន្ទឹមនោះ កាល​ពី​ថ្ងៃ​ព្រហស្បតិ៍លោក Reznikov បាន​ប្រកាស​ថា យន្តហោះ​ទី ៧ ដែល​ផ្ទុក​ជំនួយ​យោធាអាមេរិកចំនួន ៨៥ តោន បាន​មក​ដល់​ប្រទេស​អ៊ុយក្រែន ។

ភាពតានតឹងដែលអូសបន្លាយនៅជុំវិញអ៊ុយក្រែននៅតែក្ដៅគគុកក្នុងប៉ុន្មានសប្តាហ៍ថ្មីៗនេះ ខណៈណាតូបានបង្កើនការព្រួយបារម្ភលើការចោទប្រកាន់របស់រុស្ស៊ីអំពីការកសាងយោធានៅជិតព្រំដែនអ៊ុយក្រែន និងជំរុញឲ្យសម្ព័ន្ធមិត្តបង្កើនការគាំទ្រផ្នែកយោធារបស់ពួកគេសម្រាប់ទីក្រុងគៀវ ។

សហរដ្ឋអាមេរិក ចក្រភពអង់គ្លេស កាណាដា និងរដ្ឋបាល់ទិកបានផ្គត់ផ្គង់សព្វាវុធមួយចំនួនដល់អ៊ុយក្រែនរួចហើយ ភាគច្រើនជាកាំភ្លើងដៃ គ្រាប់កាំភ្លើង និងអាវុធប្រឆាំងរថក្រោះជាដើម ។

ស្របពេលជាមួយគ្នានេះ រុស្ស៊ីបានបដិសេធម្តងហើយម្តងទៀតចំពោះការចោទប្រកាន់ថាបានរៀបចំសម្រាប់ការលុកលុយអ៊ុយក្រែន ហើយបានរិះគន់ការបង្កើនយោធា និងការបង្កហេតុរបស់ណាតូនៅក្នុងតំបន់ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អាមេរិក ថា មានតែ ចិន ប៉ុណ្ណោះដែលហ៊ានប្រាប់ រុស្ស៊ី ឲ្យបន្ថយភាព តានតឹងជាមួយ អ៊ុនក្រែន