ចារកម្មអាមេរិក៖ រុស្ស៊ី ប្រើពេលតែ២ថ្ងៃទេវាយអ៊ុយក្រែន ហើយជនស៊ីវិល ៥ម៉ឺននាក់អាចស្លាប់ (មានវីដេអូ) 

ប្រទេសរុស្ស៊ីនឹងអាចវាយអ៊ុយក្រែនក្នុងរយៈពេលត្រឹមតែពីរថ្ងៃប៉ុណ្ណោះ ហើយមានជនស៊ីវិលរហូតដល់ទៅ៥០,០០០នាក់ អាចនឹងបាត់បង់ជីវិត។ នេះបើយោងតាមចារកម្មអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចារកម្មលោកខាងលិចក៏ជឿដែរថា រដ្ឋាភិបាលទីក្រុង គៀវ នឹងដួលរលំក្នុងរយៈពេលនោះ ហើយនាំឲ្យកើតមានវិបត្តិមនុស្សធម៌ដែលពាក់ព័ន្ធនឹងជនភៀសខ្លួនប្រហែល ៥លាននាក់។

ទន្ទឹមនោះ មន្ត្រីយោធា និងចារកម្មអាមេរិកជឿថា រុស្ស៊ីគ្រោងនឹងធ្វើសមយុទ្ធអាវុធនុយក្លេអ៊ែរដ៏ធំមួយនៅរយៈពេលប៉ុន្មានសប្តាហ៍ខាងមុខ ជាការព្រមានដល់អង្គការណាតូ កុំឲ្យធ្វើអន្តរាគមន៍ក្នុងព្រឹត្តិការណ៍ដែលលោក ពូទីន វាយអ៊ុយក្រែន។

លោកឧត្តមសេនីយ Mark Milley ប្រធានអគ្គសេនាធិការរួម និងលោក Avril Haines នាយកស៊ើបការណ៍ជាតិ បាននិយាយកាលពីថ្ងៃព្រហស្បតិ៍ទី៣ខែកុម្ភៈថា លោក ពូទីន គ្រោងនឹងចាប់ផ្តើមសមយុទ្ធនៅពាក់កណ្តាលខែកុម្ភៈនេះ។

ជាធម្មតា រុស្សីបានធ្វើសមយុទ្ធនុយក្លេអ៊ែរប្រចាំឆ្នាំរបស់ខ្លួននៅរដូវស្លឹកឈើជ្រុះ ប៉ុន្តែអាមេរិកជឿថា លោកពូទីន បានសម្រេចចិត្តធ្វើសមយុទ្ធនៅដើមឆ្នាំវិញ ដើម្បីជាការបង្ហាញកម្លាំង។

ចំណែក អង្គការណាតូបានព្រមានថា រុស្ស៊ីកំពុងដាក់ពង្រាយកាំជ្រួចមីស៊ីលដែលមានសមត្ថភាពនុយក្លេអ៊ែរ រួមជាមួយនឹងទាហានចំនួន ៣០,០០០នាក់នៅក្នុងប្រទេសបេឡារុស្ស។

លោក Jens Stoltenberg អគ្គលេខាធិការអង្គការ ណាតូ បាននិយាយកាលពីដើមសប្តាហ៍មុនថា រុស្ស៊ីបានដាក់ពង្រាយកងទ័ពរាប់ម៉ឺននាក់រួចទៅហើយ រួមទាំងកងកម្លាំងពិសេស Spetsnaz ជាមួយនឹងមីស៊ីល Iskander ដែលអាចបំពាក់ក្បាលគ្រាប់នុយក្លេអ៊ែរ យន្តហោះចម្បាំង និងប្រព័ន្ធប្រឆាំងយន្តហោះ S-400 ផងដែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ ពូទីន បិទភ្នែក ពេលអត្តពលិកអ៊ុយក្រែន ហែក្បួនមកដល់មុខ ក្នុងពិធីបើកអូឡាំពិក