ជនជាតិថៃមួយក្រុម ចុះឈ្មោះ ទៅប្រយុទ្ធនៅ អ៊ុយក្រែន (មានវីដេអូ)

អតីតទាហានទ័ពអាកាសថៃ ប្រែក្លាយជាសកម្មជននយោបាយឈ្មោះ Chanaphong “Ball” Phongpai គឺជាម្នាក់ក្នុងចំណោមជនជាតិថៃ ដែលបានចុះឈ្មោះដើម្បីទៅប្រយុទ្ធនៅប្រទេស អ៊ុយក្រែន។

Chanaphong អាយុ២៨ឆ្នាំបាននិយាយថា គាត់តូចចិត្តជំនួសប្រជាជនអ៊ុយក្រែន ជាពិសេសបន្ទាប់ពីមានរបាយការណ៍អំពីការវាយប្រហាររបស់រុស្ស៊ី លើជនស៊ីវិល។

Chanaphong បានប្រាប់រ៉យទ័រក្នុងបទសម្ភាសន៍មួយថា “ខ្ញុំបានចូលរួមក្នុងការទាមទារលទ្ធិប្រជាធិបតេយ្យនៅក្នុងប្រទេសរបស់ខ្ញុំ និងការប្រឆាំងចំពោះការសង្កត់សង្កិន”។

គាត់និយាយថា “ប្រជាជនអ៊ុយក្រែនក៏កំពុងប្រយុទ្ធដើម្បីលទ្ធិប្រជាធិបតេយ្យដែរ ហើយឥឡូវនេះ ត្រូវបានលុកលុយដោយមហាអំណាច និង ជនផ្តាច់ការ ដូច្នេះខ្ញុំបានសួរខ្លួនឯងថាតើខ្ញុំអាចធ្វើអ្វីបានដើម្បីពួកគេ”។

Chanaphong និងមិត្តភក្តិប្រាំនាក់បានទៅស្ថានទូតអ៊ុយក្រែន នៅទីក្រុងបាងកកកាលពីថ្ងៃពុធ ហើយបានជួបជាមួយបុគ្គលិកនៅទីនោះ បន្ទាប់ពីចុះឈ្មោះនៅលើគេហទំព័រប្រមូលព័ត៌មានអំពីការកែនទ័ព។

ក្នុងរយៈពេលតែមួយថ្ងៃប៉ុណ្ណោះនៅសប្តាហ៍នេះ ក្រុមអនឡាញជាភាសាថៃ បានប្រមូលឈ្មោះមនុស្សបានជាង២ ០០០នាក់ ដែលចាប់អារម្មណ៍ទៅប្រទេសអ៊ុយក្រែនដោយស្ម័គ្រចិត្តដើម្បីប្រយុទ្ធ។

យ៉ាងណាក្តី ស្ថានទូតអ៊ុយក្រែននៅទីក្រុងបាងកក មិនបានឆ្លើយតបទៅនឹងសំណើសុំព័ត៌មានលម្អិតពី រ៉យទ័រ ទេ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Reuters

ចុចអាន៖ ធ្លាយព័ត៌មាន៖ រុស្ស៊ី ត្រូវរង់ចាំដល់ចប់អូឡាំពិក ទើបវាយលុកអ៊ុយក្រែន ព្រោះខ្លាច ចិន ខឹង