យន្តហោះចម្បាំងរុស្ស៊ី ប្រដាប់អាវុធនុយក្លេអ៊ែរ ហោះចូលដែនអាកាស ស៊ុយអែត (មានវីដេអូ)

យោងតាមរបាយការណ៍ថ្មីមួយបានឲ្យដឹងថា យន្តហោះចម្បាំងរបស់រុស្ស៊ី ដែលផ្ទុកអាវុធនុយក្លេអ៊ែរ បានហោះចូលដែនអាកាសរបស់ប្រទេស ស៊ុយអែត លើកោះ Gotland ក្នុងសមុទ្របាល់ទិក។

យោង​តាមទូរទស្សន៍ TV4 News របស់​ស៊ុយអែតបានរាយការណ៍​ថា សកម្មភាព​នេះ​គឺ​ជា​ចេតនា​នៃ​ការ​បំភិត​បំភ័យ​។

បណ្តាញនេះផ្សាយថា យន្តហោះរុស្ស៊ីចំនួនបួនគ្រឿង ដែល២គ្រឿងជាយន្តហោះចម្បាំងធុន Sukhoi 24 និង២គ្រឿងទៀតជាយន្តហោះចម្បាំងធុន Sukhoi 27 បានហោះចេញពីមូលដ្ឋានអាកាស Kaliningrad មុនការលុកលុយថ្ងៃទី២ខែមីនា។ ប្រភពដដែលបានបង្ហើបថា យន្តហោះចម្បាំងទាំងនេះ ត្រូវបានបំពាក់ដោយអាវុធនុយក្លេអ៊ែរ។

ដោយសារតែជម្លោះក្នុងប្រទេសអ៊ុយក្រែន, កងកម្លាំងអាកាសស៊ុយអែត បានបង្កើនការត្រៀមខ្លួន ចំពោះសកម្មភាពមិនប្រក្រតីណាមួយ។

ប្រមុខកងទ័ពអាកាសស៊ុយអែតលោក Carl-Johan Edstrom បាននិយាយថា “យើងវាយតម្លៃថា នេះជាសកម្មភាពដោយចេតនា។ ​វា​ធ្ងន់ធ្ងរ​ណាស់ ជាពិសេស​នៅពេល​ប្រទេសមួយ ​មាន​សង្គ្រាម។ យើងបានវិភាគឧបទ្ទវហេតុនេះ ហើយវាច្បាស់ណាស់ថា គ្រប់យ៉ាងបង្ហាញថាពួកគេមានចេតនាបំពានព្រំដែនរបស់ប្រទេសស៊ុយអែត”។

របាយការណ៍បានបន្ថែមថា ការរំលោភលើទឹកដីស៊ុយអែត មានរយៈពេលប្រហែលមួយនាទី។

គួរបញ្ជាក់ថា ស៊ុយអែត ដែលជាប្រទេសអព្យាក្រឹត និងមិនមែនជាសមាជិកណាតូ បានដាក់ពង្រាយយន្តហោះចម្បាំង JAS 39 Gripen ចំនួនពីរគ្រឿង ដែលត្រូវបានគេនិយាយថា បានថតជាប់រូបយន្តហោះរុស្ស៊ី ដែលបញ្ជាក់ថា ពួកគេត្រូវបានបំពាក់ដោយអាវុធនុយក្លេអ៊ែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Sky

ចុចអាន៖ រុស្ស៊ី កែនមនុស្ស ១៦ ០០០នាក់ពីមជ្ឈិមបូព៌ា ទៅប្រយុទ្ធនៅ អ៊ុយក្រែន ឲ្យម្នាក់ជាង ៦ពាន់ដុល្លារក្នុងមួយខែ