លើកដំបូង អ៊ុយក្រែន ប្រើមីស៊ីលល្បឿនលឿនជាសំឡេងរបស់ អង់គ្លេស បាញ់ទម្លាក់ឧទ្ធម្ភាគចក្រ រុស្ស៊ី

ឧទ្ធម្ភាគចក្ររុស្ស៊ីធុន Mi-28N មួយគ្រឿងត្រូវបានកងកម្លាំងអ៊ុយក្រែនប្រើប្រាស់កាំជ្រួចមីស៊ីល Starstreak របស់អង់គ្លេសបាញ់ទម្លាក់ពីលើមេឃក្នុង​តំបន់ Luhansk ភាគ​ខាង​កើត​អ៊ុយក្រែន ។

ទន្ទឹមនោះ ប្រភពពីក្រសួងការពារជាតិអ៊ុយក្រែនបាននិយាយថា នេះជាលើកទីមួយហើយដែលមីស៊ីលបាញ់​ពី​ដី​ទៅ​អាកាស​លឿន​បំផុត​ក្នុង​ពិភពលោក និងជាមីស៊ីលល្បឿនលឿនជាងសំឡេង ៣ ដងរបស់អង់គ្លេសត្រូវបានប្រើប្រាស់ដោយកងកម្លាំងអ៊ុយក្រែនបាញ់ទម្លាក់យន្តហោះរុស្ស៊ី ។

ដំបូងឡើយនៅក្នុងវីដេអូនោះគេឃើញឧទ្ធម្ភាគចក្រមួយគ្រឿងកំពុងហោះចុះហោះឡើងលើដើមឈើ មុនពេលមីស៊ីល Starstreak ហោះបុកត្រូវកន្ទុយ ក្រោយមីស៊ីលបាញ់​កាត់​ដើមឈើ​ឆ្ពោះ​ទៅ​កាន់​គោលដៅ​របស់​វា​ ។

ក្រោយមកផ្នែកខាងក្រោយនៃឧទ្ធម្ភាគចក្រនោះបានផ្ទុះឆេះ ហើយធ្លាក់មកដីភ្លាមៗ ខណៈវីដេអូផ្សេងទៀតបង្ហាញពីបំណែកយន្តហោះនៅពាសពេញផ្លូវ ខណៈដែលវាត្រូវបានត្រួតពិនិត្យដោយទាហានអ៊ុយក្រែន ។

ចំណែកនាវិក ២ នាក់នៅលើឧទ្ធម្ភាគចក្រត្រូវបានគេរាយការណ៍ថាបានរួចរស់ជីវិតពីការបាញ់ទម្លាក់នោះ ប៉ុន្តែវាមិនច្បាស់ថាតើពួកគេត្រូវបានចាប់ខ្លួនដោយទាហានអ៊ុយក្រែនឬយ៉ាងណានោះទេ ។

គួររម្លឹកថា អង់គ្លេស​បាន​ប្រកាស​កាល​ពី​ថ្ងៃ​ទី៩ ខែ​មីនា នឹង​ផ្គត់ផ្គង់​មីស៊ីល​ចល័ត​ល្បឿន​លឿន​ដល់​អ៊ុយក្រែន ជាពិសេសមីស៊ីលល្បឿនលឿនជាងសំឡេង Starstreak ដើម្បីឲ្យកងទ័ពអ៊ុយក្រែនហ្វឹកហាត់នៅទីតាំងសម្ងាត់មួយក្នុងប្រទេសជិតខាង ។

ប៉ុន្តែរហូតមកដល់ពេលនេះ ចក្រភពអង់គ្លេសក៏បានផ្តល់កាំភ្លើងធំប្រឆាំងរថក្រោះចំនួន ៤,០០០ ដើមរួចហើយ ក្នុងនោះរួមទាំងប្រព័ន្ធអាវុធប្រឆាំងរថក្រោះជំនាន់បន្ទាប់ ឬ NLAWs និងកាំជ្រួចមីស៊ីល Javelin ជាដើម ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ The Sun

ចុចអាន ៖ ដាក់មីនតោនកាត់ផ្លូវក្បែរក្រុង កៀវ រថយន្តហ៊ានតែបើកប្រហែសកិនផ្ទុះខ្ទេច