ប្រមុខ ណាតូ ព្រមានថា ការវាយប្រហារនៅអ៊ុយក្រែននឹងបន្ត​ រុស្ស៊ីមិនមែនដកទ័ព ពិតប្រាកដទេ (មានវីដេអូ)

អគ្គលេខាធិការអង្គការណាតូ លោក Jens Stoltenberg បាននិយាយថា នេះមិនមែនជាការដកទ័ពរបស់រុស្ស៊ី ពិតប្រាកដទេ ហើយលោកព្រមានថា ការវាយប្រហារនៅអ៊ុយក្រែន នឹងបន្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

“អ្វីដែលយើងមើលឃើញ មិនមែនជាការដកទ័ពពិតប្រាកដឡើយ ប៉ុន្តែយើងឃើញថា រុស្ស៊ីកំពុងចល័តកងទ័ពរបស់ខ្លួន ហើយពួកគេកំពុងបំពាក់អាវុធជាថ្មីដល់កងទ័ពមួយចំនួន ដើម្បីពង្រឹងពួកគេ និងផ្គត់ផ្គង់ពួកគេឡើងវិញ។ យើងមិនគួរមានសុទិដ្ឋិនិយមពេកទេ ពីព្រោះការវាយប្រហារនឹងបន្ត”។ នេះបើតាមសម្តីលោក Stoltenberg ប្រាប់អ្នកឆ្លើយឆ្លងព័ត៌មាននយោបាយរបស់ CNN លោក Dana Bash កាលពីថ្ងៃអាទិត្យទី ៣ខែមេសា។

លោក Stoltenberg បាននិយាយក្រោយពេលទទួលរបាយការណ៍ពីរដ្ឋាភិបាលអ៊ុយក្រែនកាលពីថ្ងៃសៅរ៍ទី០២ខែមេសាថា តំបន់ កៀវ ទាំងមូលត្រូវបាន រំដោះ ពីកងកម្លាំងរុស្ស៊ីហើយ។ អនុរដ្ឋមន្ត្រីការពារជាតិអ៊ុយក្រែន លោកស្រី Hanna Maliar បាននិយាយនៅក្នុងការបង្ហោះ Facebook ថា “តំបន់ Irpin, Bucha, Gostomel និងតំបន់ កៀវ ទាំងមូលត្រូវបានរំដោះពីការវាយលុក”។

ប្រធានណាតូបានបន្តទៀតថា សម្ព័ន្ធភាពមួយនេះ ក៏មានក្តីព្រួយបារម្ភផងដែរអំពីការកើនឡើងនៃការវាយប្រហារ ជាពិសេសនៅភាគខាងត្បូង និងនៅភាគខាងកើត។

លោកបន្ថែមថា “ដូច្នេះ នេះមិនមែនជាការដកទ័ពពិតប្រាកដទេ ប៉ុន្តែជាការចល័តជាយុទ្ធសាស្ត្រ ផ្តោតលើភាគខាងត្បូង និងខាងកើត”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNN

ចុចអាន៖ រុស្ស៊ី គំរាមដើរចេញពីកិច្ចចរចាសន្តិភាព ក្រោយចោទថា អ៊ុយក្រែន វាយប្រហារ រោងចក្រប្រេង