ប្រធាន​ WFP៖ ជនស៊ីវិលក្នុងទីក្រុង Mariupol កំពុងអត់បាយ ដល់ស្លាប់

ប្រធានកម្មវិធីស្បៀងអាហារពិភពលោករបស់អង្គការសហប្រជាជាតិ ហៅកាត់​ WFP បាននិយាយថា ប្រជាជននៅក្នុងទីក្រុង Mariupol របស់ប្រទេសអ៊ុយក្រែន កំពុងអត់បាយដល់ស្លាប់។

លោកបានព្យាករណ៍ថា វិបត្តិមនុស្សធម៌របស់ប្រទេសនេះទំនងជានឹងកាន់តែអាក្រក់ទៅៗ នៅពេលដែល រុស្ស៊ី បង្កើនការវាយប្រហាររបស់ខ្លួន ក្នុងរយៈពេលប៉ុន្មានសប្តាហ៍ខាងមុខ។

លោក David Beasley បាននិយាយនៅក្នុងបទសម្ភាសន៍ជាមួយទីភ្នាក់ងារសារព័ត៌មាន Associated Press ថា “វាមិនមែនត្រឹមប៉ុន្មានថ្ងៃខាងមុខនោះទេ ប៉ុន្តែវានៅប៉ុន្មានសប្តាហ៍ និងប៉ុន្មានខែខាងមុខទៀតឯណោះ”។

ស្របពេលជាមួយគ្នានោះដែរ លោក Beasley បានកត់សម្គាល់ថា បុគ្គលិកជំនួយ មិនមានលទ្ធភាពចូលទៅកាន់ទីក្រុង Mariupol ទេ ហើយបានហៅស្ថានភាពនេះថា “បំផ្លិចបំផ្លាញ”។

គួរបញ្ជាក់ថា ជនស៊ីវិលប្រហែល ១០០ ០០០នាក់ នៅតែជាប់ក្នុងទីក្រុង Mariupol ដែលត្រូវបានឡោមព័ទ្ធ ដោយអ្នកទាំងនោះកំពុងត្រូវការអាហារ ទឹក និងកម្តៅចាំបាច់បំផុត៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ អ៊ុយក្រែន បាញ់ផ្លោងនៅតាមព្រំដែនរុស្ស៊ីវិញ បង្កឲ្យមានការជម្លៀស និងរបួសមនុស្សមួយចំនួន