ពូទីន ថា ក្រុងកៀវ គួរតែ​បញ្ជា​ឲ្យ​យុទ្ធជន​អ៊ុយក្រែន​នៅ​រោងចក្រ​ដែក​ ទម្លាក់​អាវុធ

នៅក្នុងការសន្ទនាតាមទូរសព្ទជាមួយនាយករដ្ឋមន្ត្រីអ៊ីស្រាអែល Naftali Bennett កាលពីថ្ងៃព្រហស្បតិ៍ទី០៥ខែឧសភា លោក វ្លាឌីមៀរ ពូទីន បាននិយាយថា ទីក្រុង កៀវ គួរតែបញ្ជាឲ្យយុទ្ធជនអ៊ុយក្រែននៅឯរោងចក្រ Azovstal ក្នុងទីក្រុង Mariupol ទម្លាក់អាវុធចុះ។

ទាហាន​រហូត​ដល់​ទៅ ​២០០០​នាក់ ​ត្រូវ​បាន​គេ​គិត​ថា ​នៅ​តែជាប់ក្នុងរោងចក្រ​នោះ។

ប្រធានាធិបតីរុស្ស៊ីក៏បាននិយាយផងដែរថា ប្រទេសរបស់លោកបានត្រៀមខ្លួនរួចជាស្រេចក្នុងការអនុញ្ញាតឲ្យជនស៊ីវិលជម្លៀសចេញ ប្រកបដោយសុវត្ថិភាព ខណៈទីក្រុងមូស្គូ បានប្រកាសកាលពីថ្ងៃព្រហស្បតិ៍ថា ខ្លួននឹងបើកច្រករបៀងមនុស្សធម៌រយៈពេលបីថ្ងៃ។

គួរបញ្ជាក់ថា ជនស៊ីវិលប្រហែល ២០០ នាក់ត្រូវបានគេគិតថា ជាប់នៅខាងក្នុងរោងចក្រ ទោះបីជាជាង ១០០នាក់អាចរំដោះខ្លួន បន្ទាប់ពីប្រតិបត្តិការជួយសង្គ្រោះក្នុងរយៈពេលប៉ុន្មានថ្ងៃថ្មីៗនេះក៏ដោយ៕

ប្រែសម្រួល៖ Vann Vann

ប្រភព៖ SKY

ចុចអាន៖ ពូទីន ចេញមុខសុំទោស ចំពោះពាក្យសម្តីរបស់ រដ្ឋមន្ត្រីការបរទេស រុស្ស៊ី