ជាសារផ្ញើទៅកាន់លោក វ្ល៉ាឌីមៀរ ពូទីន, អង្គការណាតូ បានបង្ហាញកម្លាំងនៅក្នុងទ្វីបអឺរ៉ុប ដោយទាហានរាប់ម៉ឺននាក់មកពីប្រទេសចំនួន ១៩ បានចូលរួមក្នុងសមយុទ្ធសង្រ្គាមនៅទូទាំងទ្វីបនេះ។

សមយុទ្ធ “ឆ្លើយតបរហ័សឆ្នាំ២០២២” នៅប្រទេសម៉ាសេដូនីខាងជើង មានការចូលរួមពីទាហាន ៤៥០០ នាក់មកពីសហរដ្ឋអាមេរិក អង់គ្លេស បារាំង អ៊ីតាលី និងប្រទេសសម្ព័ន្ធមិត្តផ្សេងទៀត ហើយកំពុងប្រព្រឹត្តទៅស្របពេល មានការលុកលុយរបស់រុស្ស៊ីនៅអ៊ុយក្រែន។

មាន​សមយុទ្ធ​យោធា​ស្រដៀង​គ្នា​នេះផ្សេងទៀត កំពុង​​ធ្វើ​នៅ​​ទីតាំង​ចំនួន​ប្រាំ ក្នុងទ្វីប​អឺរ៉ុបនា​ខែ​នេះ។

សមយុទ្ធ “ឆ្លើយតបរហ័ស” ត្រូវបានគេមើលឃើញមានការទម្លាក់ឆ័ត្រយោង ការវាយលុកតាមអាកាសដោយឧទ្ធម្ភាគចក្រ និងទាហានឆត្រយោងបារាំង និងអ៊ីតាលីធ្វើការ នៅតាមបញ្ជាការដ្ឋានរបស់អង់គ្លេស។

ចំណែកសមយុទ្ធ “កាំប្រមា” ក៏កំពុងធ្វើឡើងនៅព្រំដែន អេស្តូនី-ឡាតវី ក្នុងខែនេះផងដែរ ដោយមានការចូលរួមពីទាហាន ណាតូប្រមាណ ១៨ ០០០នាក់ នៅក្នុងសមយុទ្ធយោធាធំបំផុតនៅប្រទេស អេស្តូនី ដែលធ្វើឡើងរៀងរាល់ ៤ឆ្នាំម្តង។

ក្នុងរយៈពេល ១០ ថ្ងៃកន្លងមកនេះ ទាហានមកពីប្រទេសអាល់បានី បារាំង ក្រិក អ៊ីតាលី ម៉ាសេដូនីខាងជើង ម៉ុងតេណេក្រូ ចក្រភពអង់គ្លេស និងសហរដ្ឋអាមេរិកបានចូលរួមក្នុងសមយុទ្ធនៅម៉ាសេដូនខាងជើង។

ប្រទេសម៉ាសេដូនខាងជើង បានចូលរួមជាផ្លូវការជាមួយអង្គការណាតូក្នុងខែមីនា ឆ្នាំ ២០២០។ ប្រទេសបាល់កង់ដ៏តូចដែលមានប្រជាជន ១.៨ លាននាក់មួយនេះ មានយោធាសកម្មប្រហែល ៨០០០ នាក់។

ឧត្តមសេនីយ៍ឯក Peter B. Andrysiak អគ្គមេបញ្ជាការរងកងទ័ពអាមេរិក បាននិយាយថា “ខ្ញុំគិតថា វាជាការបង្ហាញដ៏អស្ចារ្យនៃអ្វីដែលយើងអាចធ្វើបាន ក្នុងនាមជាសម្ព័ន្ធមិត្ត និងសមត្ថភាពរបស់យើងក្នុងអំណាចប្រយុទ្ធ ហើយវាជាការបង្ហាញអំពីល្បឿននៃប្រតិបត្តិការដ៏លឿន ប្រសិនបើមានការស្នើសុំឲ្យជួយ”។

គោលបំណងនៃសមយុទ្ធនេះ គឺដើម្បីបង្ហាញពីសមត្ថភាពសម្រាប់ប្រតិបត្តិការប្រយុទ្ធលើដីគោកដ៏ធំសម្រាប់រដ្ឋជាសមាជិក និងសម្ព័ន្ធមិត្ត៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ ក្រុងមូស្គូ ព្រមានចាត់វិធានការ ព្រោះសមាជិភាពណាតូ របស់ហ្វាំងឡង់ គឺគំរាមកំហែងដល់សន្តិសុខរុស្ស៊ី ច្បាស់ៗ