រុស្ស៊ី នឹងវាយដណ្ដើមយកទីក្រុងភាគខាងកើតរបស់ អ៊ុយក្រែន ត្រឹមថ្ងៃស្អែក (មានវីដេអូ)

ការប្រយុទ្ធគ្នានៅទីក្រុង Severodonetsk ដែលជាបន្ទាយដ៏រឹងមាំភាគខាងកើតរបស់អ៊ុយក្រែននឹងកាន់តែក្តៅគគុក ខណៈដែលអភិបាលក្នុងតំបន់បានព្រមានថា កងកម្លាំងរុស្ស៊ីកំពុងព្យាយាមវាយដណ្ដើមយកទីក្រុងមួយនេះនៅថ្ងៃសុក្រនេះ ។

ទន្ទឹមនោះអភិបាលក្រុង Luhansk លោក Serhiy Haidai បាននិយាយនៅលើប្រព័ន្ធផ្សព្វផ្សាយសង្គមថា រុស្ស៊ីបាននឹងកំពុងដាក់កម្លាំងយ៉ាងច្រើនសន្ធឹកសន្ធាប់ដើម្បីវាយដណ្តើមយកទីក្រុងនេះត្រឹមថ្ងៃទី ១០ ខែមិថុនា ។

ចំណែកប្រមុខការពារជាតិរុស្ស៊ីលោក Sergei Shoigu បាននិយាយកាលពីថ្ងៃអង្គារថា តំបន់លំនៅដ្ឋានក្នុងទីក្រុង Severodonetsk ត្រូវបានរំដោះយ៉ាងពេញលេញហើយ បើទោះជាការប្រយុទ្ធគ្នានៅក្នុងទីក្រុងនៅតែកំពុងបន្តក៏ដោយ ខណៈដែលកងកម្លាំងអ៊ុយក្រែនក៏បានប្រយុទ្ធទប់ទល់នឹងការវាយប្រហារដ៏ខ្លាំងក្លាមួយនៅទីនោះផងដែរ ។

ស្របពេលជាមួយគ្នានេះ ប្រធានាធិបតីអ៊ុយក្រែនលោក Volodymyr Zelenskyy ក៏បានប្រាប់ប្រព័ន្ធផ្សព្វផ្សាយបរទេសផងដែរថា ទីតាំងមួយចំនួនរបស់ទីក្រុង Severodonetsk កំពុងស្ថិតនៅក្រោមការគំរាមកំហែងនៃការវាយលុករបស់រុស្ស៊ី ។

លោកប្រធានាធិបតីបានអំពាវនាវដល់ប្រទេសលោកខាងលិចឲ្យបន្តផ្ដល់ជំនួយយោធាដើម្បីឲ្យអ៊ុយក្រែនមានសង្ឃឹមឈ្នះនៅលើសមរភូមិ ជាពិសេសអាវុធដ៏មានឥទ្ធិពលដែលមិនខ្សោយជាងកម្លាំងសត្រូវ ។

ជាចុងក្រោយលោក Zelenskyy ក៏បានអំពាវនាវដល់សហគមន៍អន្តរជាតិឲ្យបង្កើនការដាក់ទណ្ឌកម្មសេដ្ឋកិច្ចលើទីក្រុងមូស្គូ ដែលលោកហៅថាជា អាវុធសេដ្ឋកិច្ចទំនើបដែលមិនពាក់ព័ន្ធនឹងការបង្ហូរឈាម ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ដឹងទេក្នុងមួយថ្ងៃៗ រុស្ស៊ី កើបលុយពីចំណូលប្រេងបានប៉ុន្មានលាន?