ព័ត៌មានអន្ដរជាតិ

នាយករដ្ឋមន្ត្រីអូស្ត្រាលីថា ទាល់តែចិនដកទណ្ឌកម្ម ទើបទំនាក់ទំនងល្អប្រសើរ

បានផុស

៤ years មុន

នៅ

ថ្ងៃអង្គារ ១៤ មិថុនា ២០២២

ដោយ

ប្រសិនបើប្រទេសចិនដកទណ្ឌកម្មចេញពីប្រទេសអូស្ត្រាលី នោះទំនាក់ទំនងរវាងប្រទេសទាំងពីរនឹងល្អប្រសើរ។ នេះជាការលើកឡើងរបស់នាយករដ្ឋមន្ត្រីថ្មីរបស់អូស្ត្រាលី លោក Anthony Albanese នៅថ្ងៃអង្គារ៍ ទី១៤ ខែមិថុនានេះ ហើយលោកបានចាត់ទុកជារឿងល្អដែលរដ្ឋមន្ត្រីប្រទេសទាំងពីរបានជួបគ្នា ក្រោយខកខានស្ទើរ៣ឆ្នាំ។

ប្រទេសចិនគឺជាដៃគូពាណិជ្ជកម្មធំបំផុតរបស់អូស្ត្រាលី និងជាអតិថិជនធំបំផុតសម្រាប់រ៉ែដែករបស់ខ្លួនដែលជាអ្នករកចំណូលបានពីការនាំចេញធំផុត ប៉ុន្តែទំនាក់ទំនងការទូតមានបញ្ហាអសកម្មក្នុងរយៈពេលប៉ុន្មានឆ្នាំចុងក្រោយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចិនបានដាក់ទណ្ឌកម្មដែលមានក្នុងចំពោះបញ្ជី១៤ ដូចជា ការអំពាវនាវឲ្យមានការស៊ើបអង្កេតអន្តរជាតិជុំវិញប្រភពដើមនៃជំងឺកូវីដ-១៩របស់អូស្ត្រាលី បំរាមលើក្រុមហ៊ុនទូរគមនាគមន៍ Huawei ដែលមានបណ្តាញ 5G និងពិនិត្យមើលលើការវិនិយោគបរទេសសម្រាប់ហានិភ័យសន្តិសុខជាតិជាដើម។

នាយករដ្ឋមន្ត្រីទើបចូលកាន់តំណែង លោក Anthony Albanese បាននិយាយថា ៖«វាគឺចិនដែលដាក់ទណ្ឌកម្មលើអូស្ត្រាលី។ ពួកគេត្រូវលើកទណ្ឌកម្មទាំងនោះចេញទើបទំនាក់ទំនងល្អប្រសើរ»។

អតីតរដ្ឋាភិបាលរបស់អូស្ត្រាលីបានពណ៌នាទណ្ឌកម្មរបស់ចិនលើផលិតផលកសិកម្ម និង ថាមពលរបស់ខ្លួនគឺជាការបង្វិតបង្ខំសេដ្ឋកិច្ច។ ចំពេលមានការបង្អាក់ការទូតរយៈពេលច្រើនឆ្នាំ រដ្ឋមន្ត្រីអូស្ត្រាលីមិនអាចរៀបចំការហៅទូរសព្ទជាមួយភាគីចិនបានឡើយ។

ប៉ុន្តែរដ្ឋមន្ត្រីក្រសួងការពារជាតិអូស្ត្រាលី លោក Richard Marles បានជួបសមភាគីចិន លោក Wei Fenghe នៅក្រៅសន្និសីទសារព័ត៌មានស្តីពីសន្តិសុខក្នុងប្រទេសសិង្ហបុរីកាលពីថ្ងៃអាទិត្យ។ ការជួបគ្នារយៈពេលមួយម៉ោងនោះ លោក Marles បានចាត់ទុកថា ជាជំហានដំបូងដ៏មានសារសំខាន់។

លោក Albanese លើកឡើងថា ៖«វាគឺជារឿងល្អដែលរដ្ឋមន្ត្រីប្រទេសទាំងពីរបានជួបគ្នា និងកត់សំគាល់ពីសារសំខាន់នៃពាណិជ្ជកម្មជាមួយចិនសម្រាប់សេដ្ឋកិច្ចអូស្ត្រាលី»៕

ប្រែសម្រួល៖ វីរបុត្រ
ប្រភព៖ Reuters