អឺរ៉ុប និងណាតូកំពុងប្រមូលផ្ដុំប្រទេសសម្ព័ន្ធមិត្តធ្វើសង្គ្រាមជាមួយ រុស្ស៊ី

រដ្ឋមន្ត្រីការបរទេសរុស្ស៊ីលោក Sergey Lavrov បាននិយាយកាលពីថ្ងៃសុក្រថា សហភាពអឺរ៉ុប និងអង្គការណាតូកំពុងប្រមូលផ្តុំប្រទេសសម្ព័ន្ធមិត្តធ្វើសង្គ្រាមជាមួយទីក្រុងមូស្គូ បន្ទាប់ពីការផ្តល់ឋានៈបេក្ខភាពសហភាពអឺរ៉ុបដល់អ៊ុយក្រែន និងម៉ុលដូវី ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងសន្និសីទសារព័ត៌មាននៅទីក្រុងបាគូ បន្ទាប់ពីជំនួបជាមួយសមភាគីអាស៊ែបៃហ្សង់លោក Jeyhun Bayramov, លោក Lavrov បាននិយាយថា ស្ថានភាពនេះគឺរំឭកពីហេតុការណ៍មុនសង្គ្រាមលោកលើកទី ២ នៅពេលដែលហ៊ីត្លែរបានបង្រួបបង្រួមប្រទេសអឺរ៉ុបភាគច្រើនដើម្បីធ្វើសង្រ្គាមប្រឆាំងនឹងសហភាពសូវៀត ។

លោករដ្ឋមន្ត្រីការបរទេសថ្លែងទៀតថា “នៅពេលដែលសង្រ្គាមលោកលើកទី ២ ហៀបនឹងចាប់ផ្តើម ហ៊ីត្លែរបានប្រមូលផ្តុំបណ្តាប្រទេសអ៊ឺរ៉ុបភាគច្រើននៅក្រោមបដារបស់គាត់ ។ ឥឡូវនេះសហភាពអឺរ៉ុប និងណាតូក៏កំពុងធ្វើដូចគ្នានេះ ពោលកំពុងប្រមូលផ្តុំប្រទេសសម្ព័ន្ធមិត្តសម័យទំនើបដូចគ្នាសម្រាប់ការប្រយុទ្ធ ក៏ដូចជាធ្វើសង្គ្រាមទ្រង់ទ្រាយធំជាមួយសហព័ន្ធរុស្ស៊ី ហើយយើងក៏​នឹង​ពិនិត្យ​មើលស្ថានភាព​ទាំង​អស់​នេះ​យ៉ាង​យក​ចិត្ត​ទុក​ដាក់ផងដែរ” ។

ដោយឡែកនៅពេលសួរអំពីការផ្ដល់ឋានៈបេក្ខភាពសហភាពអឺរ៉ុបដល់អ៊ុយក្រែន និងម៉ុលដូវី លោក Lavrov បាននិយាយថា មិនដូចអង្គការណាតូទេ សហភាពអឺរ៉ុបមិនមែនជាអង្គការយោធាទេ ដូច្នេះសមាជិកភាពនៅក្នុងរចនាសម្ព័ន្ធនេះមិនបង្កការគំរាមកំហែងដល់រុស្ស៊ីឡើយ ។

ជាចុងក្រោយលោក Lavrov ក៏បានកត់សម្គាល់ផងដែរថា ទីក្រុងមូស្គូបាននឹងកំពុងអនុវត្តតាមជំហានរបស់សហភាពអឺរ៉ុប ហើយ “គោលនយោបាយ Russophobic” របស់ប្លុកនឹងរលាយបាត់ក្នុងពេលឆាប់ៗនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ លោក Zelensky ឲ្យពិភពលោកដាក់ទណ្ឌកម្ម រុស្ស៊ី ២៤ ម៉ោងក្នុងមួយថ្ងៃ