ជំនួបតាមទូរស័ព្ទជាង២ម៉ោង មេដឹកនាំ អាមេរិក និង ចិន ព្រមានខ្លាំងៗ ដាក់គ្នាទៅវិញទៅមក (មានវីដេអូ)

មេដឹកនាំ​អាមេរិក និង​ចិន ​បាន​ព្រមានដាក់​គ្នា​ទៅ​វិញ​ទៅ​មក ​ជុំវិញ​បញ្ហាកោះ​តៃវ៉ាន់ ​ក្នុង​អំឡុង​ពេល​ការហៅ​ទូរស័ព្ទ​ ​រយៈពេល​ជាង​ពីរ​ម៉ោង។

លោកប្រធានាធិបតី Joe Biden បានប្រាប់សមភាគីចិនលោក Xi Jinping ថា សហរដ្ឋអាមេរិកសូមប្រឆាំងយ៉ាងដាច់អហង្ការ ចំពោះសកម្មភាពឯកតោភាគីណាមួយ ដើម្បីផ្លាស់ប្តូរឋានៈរបស់កោះតៃវ៉ាន់។ ប៉ុន្តែ​លោក​បាន​បន្ថែម​ថា គោល​នយោបាយ​របស់​សហរដ្ឋ​អាមេរិក​លើ​កោះ​នេះ ​មិន​បាន​ផ្លាស់​ប្តូរ​ទេ។

ចំណែកទីក្រុងប៉េកាំងនិយាយថា លោក Xi បានប្រាប់ទៅលោក Biden ឲ្យគោរពតាមគោលការណ៍ចិនតែមួយ ដោយព្រមានថា “អ្នកណាដែលលេងជាមួយភ្លើងនឹងរលាក”។

ក្នុងអំឡុងពេលការសន្ទនាតាមទូរស័ព្ទកាលពីថ្ងៃព្រហស្បតិ៍ទី២៨ខែកក្កដា លោក Biden និងលោក Xi ក៏បានពិភាក្សាគ្នាផងដែរ អំពីការរៀបចំកិច្ចប្រជុំទល់មុខគ្នាដែលអាចធ្វើទៅបាន។

សេតវិមាននិយាយថា ក្រៅពីបញ្ហាតៃវ៉ាន់ មេដឹកនាំទាំងពីរបានពិភាក្សាអំពីបញ្ហាជាច្រើនផ្សេងទៀត រួមទាំងការប្រែប្រួលអាកាសធាតុ និងសន្តិសុខសុខភាពជាដើម។

គួរបញ្ជាក់ថា ភាព​តានតឹង​ជុំវិញ​បញ្ហា​កោះតៃវ៉ាន់ ​បាន​កើន​ឡើង​ខ្លាំង ​មុនដំណើរទស្សនកិច្ច​សម្រាប់​ប្រធាន​សភាអាមេរិក​លោកស្រី Nancy Pelosi ទៅ​កោះ​តៃវ៉ាន់។

ក្រសួងការបរទេសអាមេរិកនិយាយថា លោកស្រី Pelosi មិនបានប្រកាសអំពីការធ្វើដំណើរណាមួយទេ ប៉ុន្តែចិនបានព្រមានអំពី “ផលវិបាកធ្ងន់ធ្ងរ” ប្រសិនបើលោកស្រីសម្រេចចិត្តធ្វើទស្សនកិច្ចបែបនេះមែន។

កាលពីសប្តាហ៍មុន លោក Biden បានប្រាប់អ្នកយកព័ត៌មានថា យោធាគិតថា វាមិនមែនជាគំនិតល្អឡើយ ប៉ុន្តែសេតវិមានរបស់លោកបានហៅវោហាសាស្ត្ររបស់ចិន ប្រឆាំងនឹងការធ្វើដំណើរបែបនេះថាជារឿងមិនមានប្រយោជន៍ និងមិនចាំបាច់ទាល់តែសោះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ អាមេរិក រៀបចំ ផែនការ យោធា ដើម្បីការពារលោកស្រី Pelosi ពេលធ្វើទស្សនកិច្ច តៃវ៉ាន់