ចិន ប្រកាសធ្វើសមយុទ្ធថ្មីទៀតនៅ សមុទ្រលឿង និងសមុទ្របូហៃ (មានវីដេអូ)

ចិននិយាយថា ខ្លួននឹងធ្វើសមយុទ្ធយោធាថ្មីទៀតនៅសមុទ្រលឿង និងសមុទ្របូហៃ បន្ទាប់ពីបញ្ចប់សមយុទ្ធដែលឡោមព័ទ្ធកោះតៃវ៉ាន់ក្នុងរយៈពេលប៉ុន្មានថ្ងៃថ្មីៗនេះ។

សមយុទ្ធដំបូង ត្រូវបានធ្វើឡើងដោយសារតែការខឹងសម្បារបស់ទីក្រុងប៉េកាំង ចំពោះដំណើរទស្សនកិច្ចរបស់ប្រធានសភាអាមេរិកលោកស្រី Nancy Pelosi ទៅកាន់ទីក្រុងតៃប៉ិ។

តៃវ៉ាន់  ចោទ​ចិន​ថា ​បានហ្វឹកហាត់​សម្រាប់​ការលុកលុយ​កោះ ដែល​ក្រុង​ប៉េកាំង​យល់​ឃើញ​ថា​ជា​របស់​ខ្លួន។ ចិន​មើល​ឃើញ​កោះ​តៃវ៉ាន់ថា​ជា​ខេត្ត​បំបែក​ខ្លួន ​ដែល​នឹងនាំមកដាក់​ក្រោម​ការ​គ្រប់​គ្រង​របស់​ក្រុង​ប៉េកាំង។

ខណៈសមយុទ្ធយោធាជាបន្តបន្ទាប់នៅជុំវិញកោះតៃវ៉ាន់ បានបិទបញ្ចប់កាលពីថ្ងៃអាទិត្យទី០៧ខែសីហា អាជ្ញាធរដែនសមុទ្រចិនបានប្រកាសថា សមយុទ្ធយោធាមួយចំនួនទៀត នឹងធ្វើឡើងនៅតាមទីតាំងផ្សេងៗ។

ក្នុងសមុទ្រលឿង ដែលស្ថិតនៅចន្លោះប្រទេសចិន និងឧបទ្វីបកូរ៉េ, សមយុទ្ធយោធាប្រចាំថ្ងៃថ្មីនឹងត្រូវចាប់ផ្តើមពីថ្ងៃសៅរ៍ចុងសប្តាហ៍នេះ រហូតដល់ពាក់កណ្តាលខែសីហា ហើយរួមទាំងសមយុទ្ធបាញ់គ្រាប់ពិតផងដែរ។

លើសពីនេះ ប្រតិបត្តិការយោធារយៈពេលមួយខែនៅក្នុងតំបន់មួយនៃសមុទ្រ បូហៃ ភាគខាងកើតប្រទេសចិន បានចាប់ផ្តើមកាលពីថ្ងៃសៅរ៍។ សមយុទ្ធយោធាដាច់ដោយឡែក ក៏បានធ្វើឡើងនៅភាគខាងជើងនៃសមុទ្រ បូហៃ ផងដែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ ចិន បញ្ចប់សមយុទ្ធយោធារយៈពេល ៤ ថ្ងៃ រកការសម្រេចចិត្តបង្រួបបង្រួម ជាមួយ តៃវ៉ាន់