ទីក្រុង បារាំង ជាង ១០០ នៅតែគ្មានទឹកផឹក ដោយសារគ្រោះរាំងស្ងួត (មានវីដេអូ)

ស្របពេលដែលផ្នែកដ៏ធំនៃទ្វីបអឺរ៉ុប កំពុងជួបប្រទះនឹងគ្រោះរាំងស្ងួតជាប្រវត្តិសាស្ត្រនោះ ទីក្រុងរបស់បារាំងជាង១០០ នៅតែមិនមានទឹកផឹកនៅឡើយ។ នេះបើយោងតាមរដ្ឋមន្ត្រីក្រសួងផ្លាស់ប្តូរអេកូឡូស៊ីលោក Christophe Bechu។

លោក Bechu ត្រូវបានដកស្រង់សម្តីដោយសារព័ត៌មាន EuroNews ក្នុងអំឡុងពេលដំណើរទស្សនកិច្ចទៅកាន់ទីក្រុង Roumoules កាលពីចុងសប្តាហ៍មុនថា “មិនមានអ្វីនៅសេសសល់ ក្នុងទុយោទៀតទេ”។ លោកបន្ថែមថា ទីក្រុងជាង១០០ នៅក្នុងប្រទេសបារាំង ឥឡូវនេះអាចពឹងផ្អែកលើការផ្គត់ផ្គង់ដែលនាំមក ដោយឡានដឹកទឹកប៉ុណ្ណោះ។

គ្រោះរាំងស្ងួត មានសភាពកាន់តែធ្ងន់ធ្ងរឡើងៗដោយសារតែរលកកម្តៅដ៏សាហាវ ដែលធ្វើឲ្យសីតុណ្ហភាពនៅក្នុងតំបន់ខ្លះនៃប្រទេសនេះ កើនឡើងដល់ ៤០ អង្សាសេ ហើយបណ្តាលឲ្យមានមានភ្លើងឆេះព្រៃ ការជម្លៀសមនុស្ស និងការស្លាប់ដោយសារកម្តៅ។

ស្របពេលជាមួយគ្នានោះ នាយករដ្ឋមន្ត្រីបារាំង លោកស្រី Elisabeth Borne បាននិយាយថា គ្រោះរាំងស្ងួតពេលនេះ គឺ អាក្រក់បំផុតមិនធ្លាប់មានសោះ នៅក្នុងប្រវត្តិសាស្ត្ររបស់ប្រទេស ហើយអះអាងថា វាក៏បានជះឥទ្ធិពលយ៉ាងធ្ងន់ធ្ងរដល់សេដ្ឋកិច្ចផងដែរ ដោយសារតែវាបានបំផ្លិចបំផ្លាញកសិករបារាំង ព្រោះដំណាំរបស់ពួកគេបានក្រៀមស្វិតក្រោមកម្តៅថ្ងៃ។

កសិករ​ខ្លះ​និយាយ​ថា ​ទិន្នផលមានការធ្លាក់ចុះ ជា​ពិសេស​ផលិតផល​ដូច​ជា សណ្តែកសៀង ផ្កាឈូករ័ត្ន និង​ពោត។

របាយការណ៍ពីគណៈកម្មការអឺរ៉ុប ដែលចេញផ្សាយកាលពីចុងខែកក្កដាបានបង្ហាញថា ជិតពាក់កណ្តាលនៃសហភាពអឺរ៉ុប ត្រូវរងផលប៉ះពាល់ទៅនឹងកម្រិតព្រមានអំពីគ្រោះរាំងស្ងួត ខណៈ ១១% នៃប្លុកនេះ អាចប្រឈមនឹងកម្រិតប្រកាសអាសន្នខ្ពស់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ ភាគខាងជើងប្រទេសអ៊ីតាលី ប្រកាសអាសន្ន គ្រោះរាំងស្ងួត