អឺរ៉ុប ជួបគ្រោះរាំងស្ងួតអាក្រក់បំផុត ក្នុងរយៈពេល ៥០០ឆ្នាំ (មានវីដេអូ)

ដោយលើកឡើងពីការវិភាគថ្មីមួយដែលចេញផ្សាយដោយមជ្ឈមណ្ឌលស្រាវជ្រាវរួមរបស់ EU (JRC), គណៈកម្មការអឺរ៉ុបបានព្រមានកាលពីថ្ងៃអង្គារទី២៣ខែសីហាថា ទ្វីបអឺរ៉ុប កំពុងជួបប្រទះគ្រោះរាំងស្ងួតអាក្រក់បំផុតក្នុងរយៈពេល ៥សតវត្សរ៍។

របាយ​ការណ៍​ខែ​សីហា​ បាន​គូស​បញ្ជាក់​ពី​ផល​ប៉ះ​ពាល់នៃ​អាកាសធាតុអាក្រក់ ​លើ​ការ​ធ្វើ​កសិកម្ម។ ស្ទើរតែពាក់កណ្តាលនៃសហភាពអឺរ៉ុប ឬ ៤៧% នៅតែស្ថិតក្រោមលក្ខខណ្ឌព្រមាន ដោយសារតែកង្វះសំណើមក្នុងដី ខណៈ១៧% នៃសហភាពអឺរ៉ុប កំពុងត្រៀមខ្លួនប្រកាសអាសន្ន ដោយសារតែឥទ្ធិពលអាកាសធាតុអវិជ្ជមានលើដំណាំ។

អ្នកវិទ្យាសាស្ត្រ បានព្យាករណ៍ពីការធ្លាក់ចុះនៃទិន្នផលដំណាំរដូវក្តៅ ដោយសារតែលក្ខខណ្ឌអាកាសធាតុធ្ងន់ធ្ងរ។ ទិន្នផលពោត ផ្កាឈូករ័ត្ន និងសណ្តែកសៀងបានធ្លាក់ចុះខ្លាំងបំផុត ពោល ​ទិន្នផលពោតបានធ្លាក់ចុះ១៦% ផ្កាឈូករ័ត្នធ្លាក់ចុះ១៥% និងសណ្តែកសៀងធ្លាក់ចុះ១២%។

យោងតាមអ្នកជំនាញ JRC, គ្រោះរាំងស្ងួតនាពេលបច្ចុប្បន្ន ហាក់ដូចជាអាក្រក់បំផុតចាប់តាំងពីយ៉ាងហោចណាស់ ៥០០ឆ្នាំមក។ ទិន្នន័យចុងក្រោយនៅចុងបញ្ចប់នៃរដូវនេះ នឹងបញ្ជាក់ពីការវាយតម្លៃបឋមនេះ។

ស្នងការអឺរ៉ុបសម្រាប់ការច្នៃប្រឌិត ស្រាវជ្រាវ វប្បធម៌ អប់រំ និងយុវជន លោកស្រី Mariya Gabriel បាននិយាយថា ការរួមបញ្ចូលគ្នានៃគ្រោះរាំងស្ងួតធ្ងន់ធ្ងរ និងរលកកម្តៅ បានបង្កើត ភាពតានតឹងដែលមិនធ្លាប់មានពីមុនមក លើកម្រិតទឹកនៅសហភាពអឺរ៉ុបទាំងមូល។

យើង​កំពុង​ជួបប្រទះ​រដូវ​ភ្លើង​ឆេះ​ព្រៃ ក្នុងអត្រា​ខ្ពស់​ជាង​មធ្យម​ និង​ផល​ប៉ះ​ពាល់​យ៉ាង​សំខាន់​លើ​ការ​ផលិត​ដំណាំ។

របាយការណ៍នេះបានព្រមានថា ស្ថានការណ៍កាន់តែអាក្រក់ទៅៗ នៅក្នុងបណ្តាប្រទេសមួយចំនួនរួមមាន អ៊ីតាលី អេស្ប៉ាញ ព័រទុយហ្គាល់ បារាំង អាល្លឺម៉ង់ ហូឡង់ បែលហ្ស៊ិក លុចសំបួ រូម៉ានី ហុងគ្រី ស៊ែប៊ីភាគខាងជើង អ៊ុយក្រែន ម៉ុលដាវី អៀរឡង់ និងចក្រភពអង់គ្លេស៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ អាមេរិក កាត់បន្ថយការប្រើប្រាស់ទឹក ខណៈជួបប្រទះគ្រោះរាំងស្ងួតអាក្រក់បំផុត ក្នុងរយៈពេលជាង ១០០០ឆ្នាំ (មានវីដេអូ)