លោក ប្រាយុទ្ធ បញ្ជាក់ថា នឹងនៅតែបន្តធ្វើជារដ្ឋមន្ត្រីការពារជាតិ

មេដឹកនាំថៃដែលត្រូវព្យួរតំណែង លោក ប្រាយុទ្ធ ចាន់អូចា បាននិយាយនៅលើប្រព័ន្ធផ្សព្វផ្សាយសង្គមថា លោកនឹងបន្តកាន់តួនាទីជារដ្ឋមន្ត្រីការពារជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាការអះអាងដោយផ្ទាល់ លើកដំបូងទៅកាន់សាធារណជន ចាប់តាំងពីតុលាការ បានបញ្ជាឲ្យលោកផ្អាកតួនាទីជានាយករដ្ឋមន្ត្រី ខណៈពេលកំពុងពិនិត្យមើល លើការកំណត់អាណត្តិរបស់លោក។

បន្ទាប់ពីលោក ប្រាយុទ្ធ ត្រូវព្យួរតួនាទី, លោកឧបនាយករដ្ឋមន្ត្រី Prawit Wongsuwan បានទទួលតំណែងជានាយករដ្ឋមន្ត្រីស្តីទី នៃប្រទេសសេដ្ឋកិច្ចធំទីពីររបស់អាស៊ីអាគ្នេយ៍ មួយនេះ។

លោក ប្រាយុទ្ធ បាននិយាយនៅលើគណនី Twitter ផ្លូវការរបស់លោកកាលពីយប់ថ្ងៃព្រហស្បតិ៍ទី២៥ ខែសីហាថា “ខ្ញុំនឹងបន្តបំពេញកាតព្វកិច្ច និងការទទួលខុសត្រូវរបស់ខ្ញុំក្នុងនាមជារដ្ឋមន្ត្រីក្រសួងការពារជាតិ សម្រាប់ប្រជាជន និងប្រទេសថៃជារៀងរាល់ថ្ងៃ”។

កាលពីថ្ងៃពុធទី២៤ខែសីហា តុលាការធម្មនុញ្ញថៃ បានសម្រេចទទួលញត្តិដែលដាក់ដោយគណបក្សប្រឆាំងដ៏ធំ ដោយលើកហេតុផលថា ពេលវេលាដែលលោក ប្រាយុទ្ធ បានចំណាយក្នុងតួនាទីជាប្រមុខយោធា បន្ទាប់ពីការឡើងកាន់អំណាចក្នុងរដ្ឋប្រហារឆ្នាំ២០១៤ គួរតែរាប់បញ្ចូលជាពេលវេលាសរុប នៅក្នុងតំណែងរបស់លោក។

រដ្ឋធម្មនុញ្ញថៃ បាន​កំណត់​អាណត្តិ​នាយក​រដ្ឋមន្ត្រី មានរយៈពេល​៨​ឆ្នាំ។

ទោះបីជាយ៉ាងណាក៏ដោយ គេ​​មិន​ទាន់​ច្បាស់​នៅ​ឡើយ​ទេ​ថា តើ​ពេល​ណា​តុលាការ​នឹង​ចេញ​សេចក្តី​សម្រេច​លើ​ការ​ពិនិត្យ​នេះ៕

ប្រែសម្រួល៖ Vann Vann

ប្រភព៖ CNA

ចុចអាន៖ បុរសខ្លាំង ៥ រូបទៀតក៏អាចតែងតាំងជានាយករដ្ឋមន្ត្រីចាំផ្ទះ ក្រៅពីលោក Prawit