ស្លាប់៣៣ នាក់ក្នុងហេតុការណ៍លិចទូកនៅ សាធារណរដ្ឋប្រជាធិបតេយ្យកុងហ្គោ

មនុស្សយ៉ាងតិច៣៣នាក់បានស្លាប់ក្នុងហេតុការណ៍លិចទូកដឹកអ្នករកស៊ីនៅបឹង Albert ភាគឦសាន សាធារណរដ្ឋប្រជាធិបតេយ្យកុងហ្គោ។

អ្នកនាំពាក្យរដ្ឋាភិបាលខេត្តបានប្រាប់ទីភ្នាក់ងារ Anadolu ថា មនុស្សចំនួនប្រាំបីនាក់បានរួចជីវិតពីឧប្បត្តិហេតុដែលបានកើតឡើងនៅជិតតំបន់ Kolokoto ក្នុងទឹកដី Mahagi នៃខេត្ត Ituri ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រំដែនរវាងប្រទេសអ៊ូហ្គង់ដានិងសាធារណរដ្ឋប្រជាធិបតេយ្យកុងហ្គោត្រូវបានបិទអស់រយៈពេលជាច្រើនខែមកហើយដោយសារតែជំងឺរាតត្បាតកូវីដ១៩។

លោក Vital Adubangu ប្រធានអង្គការសង្គមស៊ីវិលមួយបាននិយាយថា សោកនាដកម្មនេះបានកើតឡើងបន្ទាប់ពីមានខ្យល់បក់បោកយ៉ាងខ្លាំងនៅលើបឹង។

លោកបានប្រាប់ទីភ្នាក់ងារ Anadolu ថា “សាកសពជនរងគ្រោះត្រូវបានប្រគល់ទៅឲ្យក្រុមគ្រួសាររបស់ពួកគេដើម្បីធ្វើបុណ្យ”។

គួរបញ្ជាក់ថា បឹង Albert ដែលជាបឹងធំជាងគេទី៧នៅទ្វីបអាហ្រ្វិកគឺស្ថិតនៅចន្លោះកណ្តាលរវាងប្រទេសអ៊ូហ្គង់ដានិងសាធារណរដ្ឋប្រជាធិបតេយ្យកុងហ្គោ។ មនុស្សជាច្រើនមកពីប្រទេសទាំងពីររួមទាំងពាណិជ្ជករផងដែរបានប្រើបឹងនេះដើម្បីដឹកជញ្ជូនទំនិញ៕

ប្រែសម្រួលដោយ៖ Vann Vann

ប្រភព៖ Anadolu

ចុចអាន៖ ជនចំណាកស្រុក៧៤នាក់លង់ទឹកស្លាប់ក្នុងប្រទេស លីប៊ី