លោកយាយអាយុ ១០១ ឆ្នាំទទួលការចាក់វ៉ាក់សាំងកូវីដដំបូងគេនៅអាល្លឺម៉ង់

យោងតាមការចុះផ្សាយដោយសារព័ត៌មាន MDR កាលពីថ្ងៃសៅរ៍បានឲ្យដឹងថា លោកយាយអាយុ ១០១ ឆ្នាំម្នាក់ក្លាយជាជនជាតិអាល្លឺម៉ង់ដំបូងគេទទួលបានការចាក់វ៉ាក់សាំងប្រឆាំងជំងឺកូវីដ ១៩ ពោលមួយថ្ងៃមុនការចាប់ផ្តើមយុទ្ធនាការចាក់វ៉ាក់សាំងផ្លូវការរបស់ប្រទេសនេះ ។

MDR បានរាយការណ៍ថា ស្ត្រីម្នាក់មកពីទីក្រុង Halberstadt នៅជួរភ្នំ Harz រស់នៅក្នុងមជ្ឈមណ្ឌលថែទាំមនុស្សចាស់ដែលមានមនុស្ស ៤០ នាក់ និងបុគ្គលិក ១១ នាក់ក៏បានទទួលការចាក់វ៉ាក់សាំងនេះផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះរដ្ឋាភិបាលសហព័ន្ធគ្រោងនឹងចែកចាយវ៉ាក់សាំងច្រើនជាង ១.៣ លានដូសទៅឲ្យអាជ្ញាធរសុខភាពក្នុងតំបន់នៅចុងឆ្នាំនេះ និងប្រហែល ៧០០,០០០ ដូសក្នុងមួយសប្តាហ៍ចាប់ពីខែមករា ។

ប្រទេសអាល្លឺម៉ង់ដែលមានប្រជាជន ៨៣ លាននាក់បានបង្កើតមណ្ឌលចាក់វ៉ាក់សាំងជាង ៤០០ កន្លែងរួមទាំងនៅតាមទីធ្លានានាដូចជាអតីតព្រលានយន្តហោះ Tegel និង Tempelhof របស់ទីក្រុង Berlin និងសាលពិព័រណ៍ពាណិជ្ជកម្មរបស់ទីក្រុង Hamburg ជាដើម ។

គួរបញ្ជាក់ថា គិតត្រឹមពេលនេះប្រទេសអាល្លឺម៉ង់មានករណីឆ្លងជំងឺកូវីដ ១៩ ចំនួន ១,៦៤៣,១៦៩ ករណី និងមានអ្នកស្លាប់ចំនួន ៣០,១៥៧ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ REUTERS

ចុចអាន ៖ អាជ្ញាធរខេត្ត សាមុតសាខន សម្រេចយកទីតាំងមួយនេះធ្វើជាមន្ទីរពេទ្យដាក់អ្នកជំងឺកូវីដ

ចុចអាន ៖ ស្លាប់៣៣ នាក់ក្នុងហេតុការណ៍លិចទូកនៅ សាធារណរដ្ឋប្រជាធិបតេយ្យកុងហ្គោ