ព័ត៌មានអន្ដរជាតិ

ឆេះរោងចក្រផលិតឱសថមួយកន្លែងនៅកូរ៉េខាងត្បូង ស្លាប់និងរបួសធ្ងន់ច្រើននាក់

បានផុស

៤ years មុន

នៅ

ថ្ងៃសៅរ៍ ១ តុលា ២០២២

ដោយ

យោងតាមទីភ្នាក់ងារសារព័ត៌មាន Yonhap បានឲ្យដឹងថា រោងចក្រផលិតឱសថមួយកន្លែងនៅទីក្រុង Hwaseong ភាគខាងត្បូងសេអ៊ូល ត្រូវអគ្គីភ័យឆាបឆេះកាលពីថ្ងៃសុក្រ បណ្ដាលឲ្យមនុស្សម្នាក់ស្លាប់ និង ១៧ នាក់ផ្សេងទៀតរងរបួសធ្ងន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីប៉ូលិសបានបញ្ជាក់ថា អគ្គីភ័យបានឆាបឆេះរោងចក្រ Hwail Pharmaceutical Co. នៅវេលាម៉ោង ២ និង២២នាទីរសៀល ហើយការផ្ទុះនេះកើតចេញពីជាន់ទី៣នៃអគារ៥ជាន់។ ភ្លាមៗការហៅទូរស័ព្ទសង្គ្រោះបន្ទាន់ជាច្រើនបានរាយការណ៍ថា ពួកគេបានឮសំឡេងនៃការផ្ទុះមួយយ៉ាងខ្លាំង។

មន្ត្រីបាននិយាយបន្ថែមទៀតថា អ្នកស្លាប់ម្នាក់គឺជាមនុស្សអាយុជាង២០ឆ្នាំ ដែលដំបូងបានបាត់ខ្លួន ហើយក្រោយមកបានរកឃើញសពនៅក្រោយរោងចក្រ។ ក្នុងចំណោមអ្នករងរបួសទាំង១៧នាក់ មាន៤នាក់របួសធ្ងន់ ខណៈ១៣នាក់ផ្សេងទៀតរងការស្រូបផ្សែង ហើយភ្លើងក៏បានរលត់នៅវេលាម៉ោង៦:២៣នាទី។

យ៉ាងណាមិញ រថយន្តពន្លត់អគ្គីភ័យចំនួន ៩២ គ្រឿង រថយន្តបូមទឹក និងឧបករណ៍ផ្សេងទៀតត្រូវបានបញ្ជូនទៅកាន់កន្លែងកើតហេតុ រួមជាមួយនឹងអ្នកពន្លត់អគ្គីភ័យចំនួន ២០១ នាក់ និងអ្នកជួយសង្គ្រោះផ្សេងទៀត។ ទន្ទឹមគ្នានោះដែរ ប៉ូលិសនិងអ្នកពន្លត់អគ្គិភ័យ កំពុងពិនិត្យរកមូលហេតុពិតប្រាកដដែលភ្លើងឆាបឆេះ៕

ប្រែសម្រួល៖ សាង ស្រីល័ក្ខ

ប្រភព៖Yonhap

ចុចអាន៖ឆេះផ្សារទំនើបនៅ កូរ៉េខាងត្បូង មានទាំងអ្នកស្លាប់ និងរបួស

Related Topics:ប្រទេសកូរ៉េខាងត្បូង