អ្នកស្លាប់ក្នុងការប្រកួតបាល់ទាត់នៅប្រទេសឥណ្ឌូណេស៊ី កើនដល់ជាង ១៧០ នាក់

យ៉ាងហោចណាស់មនុស្ស ១៧៤ នាក់ត្រូវបានស្លាប់ បន្ទាប់ពីការប៉ះទង្គិចបានផ្ទុះឡើងក្នុងអំឡុងពេលការប្រកួតបាល់ទាត់លីគទី១ ក្នុងប្រទេសឥណ្ឌូណេស៊ី ខណៈសេចក្ដីរាយការណ៍បឋម នាក់ស្លាប់មានត្រឹមចំនួន ១២៩ នាក់។

តាមប្រភពព័ត៌មានពី Skysports បានឱ្យដឹងថា អំពើហិង្សាបានផ្ទុះឡើងនៅកីឡដ្ឋានមួយក្នុង East Java អំឡុងពេលការប្រកួតរវាងក្លិប Arema ជាមួយក្លិប Persebaya Surabaya បន្ទាប់ពីការរត់ជាន់គ្នា បានចាប់ផ្តើមនៅពេលដែលប៉ូលីសបានបាញ់ឧស្ម័នបង្ហូរទឹកភ្នែកចូលទៅក្នុងហ្វូងមនុស្ស។ មនុស្សជាង ៣០០ នាក់ត្រូវបានបញ្ជូនទៅកាន់មន្ទីរពេទ្យនៅក្បែរនោះ ប៉ុន្តែមនុស្សជាច្រើនបានស្លាប់នៅតាមផ្លូវ និងពេលកំពុងព្យាបាល។

ហេតុបានផ្ទុះឡើងបន្ទាប់ពីក្លិប Persebaya Surabaya បានយកឈ្នះ ៣-២ លើម្ចាស់ផ្ទះ ហើយយោងទៅតាមរបាយការណ៍ក្នុងស្រុកអ្នកគាំទ្រ Arema រាប់ពាន់នាក់បានបន្តទៅកាន់ទីលានបន្ទាប់ពីក្រុមរបស់ពួកគេចាញ់ ដោយការមិនសុខចិត្តចំពោះការប្រកួត។ ការរត់ជាន់គ្នាក៏បានចាប់ផ្តើមនៅពេលប៉ូលិសបានបាញ់ឧស្ម័នបង្ហូរទឹកភ្នែកចូលទៅក្នុងហ្វូងមនុស្ស។

នៅក្នុងគ្រោះមហន្តរាយនៅកីឡដ្ឋានដ៏អាក្រក់បំផុតមួយរបស់ពិភពលោកនេះ គឺមនុស្សជាង ៣០០ នាក់ត្រូវបានបញ្ជូនទៅកាន់មន្ទីរពេទ្យក្បែរនោះ ប៉ុន្តែមនុស្សជាច្រើនបានស្លាប់នៅតាមផ្លូវ ឬពេលកំពុងព្យាបាល។

លោក Nico Afinta មេប៉ូលីស East Java បាននិយាយនៅក្នុងសន្និសីទសារព័ត៌មាន នៅថ្ងៃអាទិត្យនេះថា “យើងបានធ្វើសកម្មភាពបង្ការរួចហើយ មុនពេលយើងបានបាញ់ឧស្ម័នបង្ហូរទឹកភ្នែក ខណៈដែលអ្នកគាំទ្របានចាប់ផ្តើមវាយប្រហារប៉ូលីស ដោយធ្វើសកម្មភាពអនាធិបតេយ្យ និងដុតរថយន្ត”។

ជនរងគ្រោះមួយចំនួនបានរងរបួសខួរក្បាល ហើយគ្រូពេទ្យម្នាក់បានប្រាប់ប្រព័ន្ធផ្សព្វផ្សាយក្នុងស្រុកថា ក្មេងអាយុ ៥ ឆ្នាំម្នាក់ស្ថិតក្នុងចំណោមអ្នកដែលបានស្លាប់។

មន្ត្រីសុខាភិបាលក្នុងតំបន់បាននិយាយថា ជនរងគ្រោះជាច្រើនបានស្លាប់ដោយសារ ភាពចលាចល ការចង្អៀតណែន ការរត់ជាន់គ្នា និងថប់ដង្ហើម។ ជាមួយគ្នានោះ ២ នាក់ក្នុងចំណោមអ្នកស្លាប់នៅកីឡដ្ឋាន Kanjuruhan ក្នុងទីក្រុង Malang ត្រូវបានរាយការណ៍ថាជា មន្ត្រីប៉ូលិស។

យោងតាមបទបញ្ញត្តិរបស់ FIFA ចែងថា មិនត្រូវមាន អាវុធ ឬ “ឧស្ម័នគ្រប់គ្រងហ្វូងមនុស្ស” ត្រូវបានយក ឬប្រើប្រាស់ដោយប៉ូលីសទេ។

លោក Mahfud MD ប្រធានរដ្ឋមន្ត្រីសន្តិសុខរបស់ប្រទេសឥណ្ឌូណេស៊ី បាននិយាយនៅលើប្រព័ន្ធផ្សព្វផ្សាយសង្គមថា កីឡដ្ឋាននេះត្រូវបានបំពេញហួសសមត្ថភាព ខណៈពេលដែលកន្លែងកីឡាត្រូវបានសន្មត់ថា ផ្ទុកមនុស្សបានត្រឹមតែ ៣៨ ០០០ នាក់ប៉ុណ្ណោះ គាត់អះអាងថា សំបុត្រចំនួន ៤២ ០០០ ត្រូវបានលក់លើសចំនួនផ្ទុក៕

អត្ថបទ៖ មន្នីរ័ត្ន