ព័ត៌មានអន្ដរជាតិ

ខេត្តឈៀងម៉ៃ នឹងធ្វើតេស្តរកសារធាតុញៀនលើមន្ត្រីប៉ូលិសទាំងអស់ ក្រោយការសម្លាប់រង្គាល

បានផុស

១ year មុន

នៅ

ថ្ងៃសុក្រ ១៤ តុលា ២០២២

ដោយ

ខេត្តឈៀងម៉ៃគ្រោងនឹងស្នើឲ្យមន្ត្រីចំនួន ៣,៥០០ នាក់មកពីគ្រប់ប៉ុស្តិ៍ប៉ូលិសក្នុងខេត្ត ធ្វើតេស្តរកគ្រឿងញៀនដើម្បីបង្កើតសេចក្ដីទុកចិត្ត និងទំនុកចិត្តក្នុងសហគមន៍ បន្ទាប់ពីមានការសម្លាប់រង្គាលនៅមជ្ឈមណ្ឌលថែទាំកុមារក្នុងខេត្ត Nong Bua Lamphu ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេបញ្ជាការប៉ូលិសខេត្តឈៀងម៉ៃលោក Thawatchai Pongwiwattanachai បានរាយការណ៍ប្រាប់សារព័ត៌មាន Thairath កាលពីថ្ងៃព្រហស្បតិ៍ថា ប៉ូលិសនឹងចាប់ផ្តើមគម្រោងមួយដែលមានឈ្មោះថា “ប៉ូលិសស្អាតស្អំ” ហើយប៉ូលិសចាប់ពីថ្នាក់កំពូលរហូតដល់មន្រ្តីមិនមានតួនាទីនឹងទទួលការធ្វើតេស្តគ្រឿងញៀននៅចុងសប្តាហ៍នេះ ។

លោក Thawatchai បានពន្យល់ថា គម្រោងនេះត្រូវបានចាប់ផ្តើមដើម្បីបង្កើតសេចក្ដីទុកចិត្ត និងទំនុកចិត្តនៅក្នុងសហគមន៍ជាមួយនឹងមន្ត្រីរបស់ខ្លួន បន្ទាប់ពីអតីតមន្ត្រីប៉ូលិសឈ្មោះ Panya Khamrap បានសម្លាប់មនុស្ស ៣៧ នាក់កាលពីសប្តាហ៍មុន ។

យោងតាមរបាយការណ៍នេះ ឧបករណ៍ធ្វើតេស្តរកសារធាតុញៀនក្នុងទឹកនោមនឹងត្រូវបញ្ជូនទៅកាន់ប៉ុស្តិ៍នគរបាលចំនួន ៣៨ ក្នុងខេត្ត ហើយមន្ត្រីចំនួន ៣,៥០០ នាក់នឹងផ្តល់សំណាកនៅចុងសប្តាហ៍នេះ ។

មន្ត្រីណាម្នាក់ដែលត្រូវបានធ្វើតេស្តរកឃើញសារធាតុញៀននឹងត្រូវបញ្ជូនទៅមណ្ឌលកែប្រែគ្រឿងញៀន និងផ្ដន្ទាទោសតាមច្បាប់ ។ ជាងនេះទៅទៀត មន្ត្រីទាំងនោះនឹងត្រូវផ្តន្ទាទោសយ៉ាងធ្ងន់ធ្ងរ ប្រសិនបើពួកគេពាក់ព័ន្ធការជួញដូរគ្រឿងញៀនខុសច្បាប់ផងដែរ ។

ជាចុងក្រោយលោក Thawatchai បន្ថែមថា ប៉ូលិសត្រូវតែមានកិច្ចប្រជុំពិភាក្សាបញ្ហាគ្រឿងញៀនក្នុងសហគមន៍ជាទៀងទាត់ ហើយមន្ត្រីត្រូវតែប្រឹងប្រែងអស់ពីសមត្ថភាពដើម្បីបំបាត់បញ្ហាទាំងនោះក្នុងសហគមន៍ និងបញ្ជូនអ្នកញៀនថ្នាំទៅមណ្ឌលស្តារនីតិសម្បទាផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Thaiger

ចុចអាន ៖ លោក ប្រាយុទ្ធ ត្រៀមធ្វើវិសោធនកម្មច្បាប់គ្រឿងញៀន មានមេតំហ្វីតាមីន ៥ គ្រាប់ចាត់ទុកជាអ្នកជួញដូរ