លោក ប្រាយុទ្ធ ត្រៀមធ្វើវិសោធនកម្មច្បាប់គ្រឿងញៀន មានមេតំហ្វីតាមីន ៥ គ្រាប់ចាត់ទុកជាអ្នកជួញដូរ

នាយករដ្ឋមន្ត្រីថៃលោក ប្រាយុទ្ធ ចាន់អូចា កាលពីពុធបានបញ្ជាឲ្យពិនិត្យឡើងនូវច្បាប់កាន់កាប់អាវុធ និងត្រៀមធ្វើវិសោធនកម្មច្បាប់គ្រឿងញៀនថ្មី ពោលគឺបុគ្គលណាមានសារធាតុមេតំហ្វីតាមីនចាប់ពី ៥ គ្រាប់ ត្រូវចាត់ទុកជាអ្នកជួញដូរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំពោះបញ្ហាគ្រឿងញៀននេះ លោក ប្រាយុទ្ធ ចាន់អូចា បានថ្លែងនៅក្នុងកិច្ចប្រជុំដើម្បីកំណត់វិធានការជាបន្ទាន់ក្នុងការដោះស្រាយបញ្ហាគ្រឿងញៀន និងការគ្រប់គ្រងអាវុធថា រដ្ឋាភិបាលនឹងចាត់វិធានការប្រឆាំង និងទប់ស្កាត់បទល្មើសគ្រឿងញៀន ដោយត្រូវត្រួតពិនិត្យការនាំចូល និងនាំចេញសារធាតុគីមី ពន្លឿន និងពង្រីកការស៊ើបអង្កេត កម្ចាត់បណ្តាញជួញដូរគ្រឿងញៀន និងការរឹបអូសទ្រព្យសម្បត្តិឈ្មួញគ្រឿងញៀនជាដើម ។

ទន្ទឹមគ្នានេះកិច្ចប្រជុំក៏បានពិភាក្សាពីបរិមាណគ្រឿងញៀនចាប់ពី ៥ គ្រាប់ ឬ ១៥ គ្រាប់ត្រូវចាត់ទុកជាអ្នកជួញដូរ ហើយប្រសិនបើចាំបាច់ច្បាប់ទាំងនេះត្រូវតែធ្វើវិសោធនកម្មតែម្ដង ។

ការចេញបញ្ជារបស់លោក ប្រាយុទ្ធ កើតឡើង បន្ទាប់ពីការសម្លាប់រង្គាលដោយអតីតប៉ូលិសម្នាក់នៅទារកដ្ឋានដែលបង្កភាពតក់ស្លុតទូទាំងប្រទេស ។

មនុស្សសរុប ៣៦ នាក់ រួមទាំងកុមារ ២៤ នាក់ផងដែរនោះត្រូវបានសម្លាប់ក្នុងការវាយប្រហារដោយកាំបិត និងកាំភ្លើងកាលពីសប្តាហ៍មុន ហើយនោះគឺជាការសម្លាប់កុមារដ៏អាក្រក់បំផុតមួយនៅក្នុងហេតុការណ៍សម្លាប់រង្គាលដោយឃាតកតែម្នាក់ក្នុងប្រវត្តិសាស្ត្រសម័យថ្មីនេះ ៕

ប្រែសម្រួលដោយ ៖ គង់ សំអាន

ប្រភព ៖ Naewna

ចុចអាន ៖ លោក ប្រាយុទ្ធ បញ្ជាឲ្យរឹតបន្តឹងច្បាប់កាំភ្លើង និងបង្រ្កាបគ្រឿងញៀន ក្រោយការសម្លាប់រង្គាល