រុស្ស៊ី ព្រមាន អាមេរិក និងអង់គ្លេស អំពីផែនការប្រើ “គ្រាប់បែកកខ្វក់” របស់ អ៊ុយក្រែន (មានវីដេអូ)

ក្រសួងការពារជាតិរុស្ស៊ី បាននិយាយកាលពីថ្ងៃចន្ទទី២៤ខែតុលាថា ទីក្រុងមូស្គូ បានពិភាក្សាជាមួយទីក្រុងឡុងដ៍ និងវ៉ាស៊ីនតោនក្នុងកម្រិតអគ្គសេនាធិការ អំពីការគំរាមកំហែងរបស់ទីក្រុងកៀវ ដែលអាចប្រើ “គ្រាប់បែកកខ្វក់”។

ប្រមុខការពារជាតិរុស្ស៊ី ឧត្តមសេនីយ៍ Valery Gerasimov បានលើកឡើងពីកង្វល់នៃប្រទេសរបស់លោក នៅក្នុងកិច្ចសន្ទនាតាមទូរស័ព្ទជាមួយប្រធានអគ្គសេនាធិការចម្រុះអាមេរិក លោកឧត្តមសេនីយ៍ Mark Milley បន្ទាប់ពីមានការសន្ទនាស្រដៀងគ្នា ជាមួយសមភាគីអង់គ្លេសគឺឧត្តមនាវីឯក Tony Radakin។

ក្រសួងការពារជាតិអង់គ្លេសបាននិយាយថា ការហៅទូរស័ព្ទរវាងលោក Radakin និង Gerasimov គឺធ្វើឡើងតាមសំណើរបស់ក្រសួងការពារជាតិរុស្ស៊ី។ យ៉ាងណាក្តី ចក្រភពអង់គ្លេស បានច្រានចោលការចោទប្រកាន់របស់រុស្ស៊ីដែលថា អ៊ុយក្រែនកំពុងរៀបចំផែនការសកម្មភាពដើម្បីបង្កើនជម្លោះ។

រឿងនេះ កើតឡើងមួយថ្ងៃបន្ទាប់ពីរដ្ឋមន្ត្រីការពារជាតិរុស្ស៊ីលោក Sergey Shoigu បានលើកឡើងពីការព្រួយបារម្ភស្រដៀងគ្នា ក្នុងការហៅទូរស័ព្ទជាមួយប្រមុខការពារជាតិអាមេរិក អង់គ្លេស និងបារាំង។

ទីក្រុងមូស្គូ បានព្រមានប្រទេសលោកខាងលិច អំពីផែនការរបស់ទីក្រុងកៀវ ក្នុងការប្រើប្រាស់ “គ្រាប់បែកកខ្វក់” ដើម្បីធ្វើឲ្យប្រទេសរុស្ស៊ីស្ងប់ស្ងាត់។ យ៉ាង​ណា​មិញ លោក​ខាង​លិច​នៅ​តែ​ច្រាន​ចោល​ការ​ព្រមាន​បែប​នេះ។

កាលពីព្រឹកថ្ងៃចន្ទ ក្រសួងការពារជាតិរុស្ស៊ីបានអះអាងថា ទីក្រុងកៀវ ចង់ដាក់ទីក្រុងមូស្គូជា “រដ្ឋភេរវករនុយក្លេអ៊ែរ” ដោយចោទប្រកាន់ថា រុស្ស៊ីបានប្រើប្រាស់អាវុធប្រល័យលោក ដូច្នេះអ៊ុយក្រែនអាចចាប់ផ្តើម យុទ្ធនាការប្រឆាំងរុស្ស៊ីដ៏មានឥទ្ធិពលបាន។

ស្របពេលជាមួយគ្នានោះដែរ ទីក្រុង កៀវ បានបដិសេធការចោទប្រកាន់របស់ទីក្រុងមូស្គូ។ ប្រធានាធិបតីអ៊ុយក្រែន លោក Vladimir Zelensky ក៏បាននិយាយដែរថា ភាគីតែមួយគត់ដែលមានសមត្ថភាពវាយប្រហារដោយប្រើអាវុធនុយក្លេអ៊ែរ គឺរុស្ស៊ីខ្លួនឯង៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖​ RT

ចុចអាន៖ ១៦ប្រទេស បញ្ជូនគ្រូ ទៅបង្វឹក ទាហាន អ៊ុយក្រែន