ក្រុងសេអ៊ូល៖ កូរ៉េខាងជើង​ រៀបចំរួចស្រេចអស់ហើយ ​សម្រាប់​ការ​សាកល្បង​នុយក្លេអ៊ែរ (មានវីដេអូ)

ប្រធានាធិបតីកូរ៉េខាងត្បូង បានប្រាប់សភាថា ប្រទេសកូរ៉េខាងជើង បានរៀបចំរួចរាល់អស់ហើយ សម្រាប់ការធ្វើតេស្តនុយក្លេអ៊ែរ។ ការលើកឡើងនេះ បង្កឲ្យមានក្តីបារម្ភថា ការបំផ្ទុះអាវុធបរមាណូលើកដំបូងរបស់ទីក្រុងព្យុងយ៉ាង ក្នុងរយៈពេល៥ឆ្នាំ អាចនឹងកើតឡើងឆាប់ៗ។

លោក Yoon Suk Yeol បាននិយាយកាលពីថ្ងៃអង្គារទី២៥ខែតុលាថា “យើងវាយតម្លៃថា កូរ៉េខាងជើង បានបញ្ចប់ការត្រៀមរៀបចំរួចរាល់ហើយ សម្រាប់ការសាកល្បងនុយក្លេអ៊ែរលើកទី៧”។

សហរដ្ឋអាមេរិក កូរ៉េខាងត្បូង និងជប៉ុន សុទ្ធតែបានសន្យា ដាក់ទណ្ឌកម្មយ៉ាងម៉ឺងម៉ាត់ និងរួបរួមចំពោះការសាកល្បងនុយក្លេអ៊ែរ ដែលនឹងបំពានលើសេចក្តីសម្រេច របស់ក្រុមប្រឹក្សាសន្តិសុខអង្គការសហប្រជាជាតិ។

លោក John Kirby អ្នកនាំពាក្យក្រុមប្រឹក្សាសន្តិសុខជាតិរបស់ប្រធានាធិបតី Joe Biden បានប្រាប់អ្នកសារព័ត៌មាននៅទីក្រុងវ៉ាស៊ីនតោនថា សហរដ្ឋអាមេរិកជឿជាក់ថា កូរ៉េខាងជើង អាចធ្វើការសាកល្បងនុយក្លេអ៊ែរនៅពេលណាក៏បាន។

លោក គីម ដែល​បានបំផ្ទុះ​អាវុធ​នុយក្លេអ៊ែរ​លើក​ចុង​ក្រោយ​ក្នុង​ឆ្នាំ២០១៧ អាច​នឹង​សម្លឹងទៅ​រក​ការ​ធ្វើ​តេស្ត​មួយទៀត ​ដើម្បី​ពង្រឹង​សមត្ថភាព​រដ្ឋ​របស់​លោក​ ក្នុង​ការ​បំពាក់​ក្បាល​គ្រាប់​ឲ្យ​សមទៅ​នឹងមីស៊ីល​ថ្មី​របស់​ខ្លួន ​ដែល​ត្រូវ​បាន​រចនា​ឡើង​ដើម្បី​វាយប្រហារ​កូរ៉េ​ខាង​ត្បូង និង​ជប៉ុន។

លោក គីម ក៏កំពុងសម្លឹងទៅរកការបង្កើនថាមពលរបស់ឧបករណ៍នុយក្លេអ៊ែរ ដែលនឹងត្រូវបានបំពាក់នៅលើមីស៊ីលរយៈចម្ងាយឆ្ងាយ ដែលត្រូវបានរចនាឡើងដើម្បីវាយប្រហារដីគោករបស់សហរដ្ឋអាមេរិកផងដែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Yahoo

ចុចអាន៖ កូរ៉េខាងជើង បង្កើនសន្តិសុខដើម្បីសុវត្ថិភាពលោក គីម ខណៈភ័យខ្លាចថា មន្ត្រីមួយចំនួនលែងស្មោះត្រង់